Олий Мажлис Қонунчилик палатаси депутатлари иштирокидаги республика ишчи гуруҳи Навоий вилоятида бўлиб, тиббиёт соҳасидаги аҳволни ўрганиш, мавжуд муаммоларни таҳлил қилиш ва уларни жойида бартараф этиш масаласига эътибор қаратмоқда. Бу ҳақда ЎзА хабар берди.
Ишчи гуруҳи аъзолари Конимех туман санитария-эпидемиология хизмати бўлими фаолияти билан яқиндан танишди. Ўрганишлар жараёнида мазкур муассасанинг фаолиятидаги камчиликлар яққол кўзга ташланди.
— Ўрганиш жараёнида Конимех туман санитария-эпидемиология хизмати бўлими раҳбари ва унинг ўринбосарини топишнинг иложи бўлмади, — дейди Қонунчилик палатаси депутати Жамшид Пирматов. — Мазкур муассасада 40 дан ортиқ ходим ишлайди. Аммо муассаса фаолияти билан танишиш чоғида ходимлардан бор-йўғи беш нафарини иш жойида учратдик. Муассасадаги тозалик ишлари умуман талабга жавоб бермайди. Вакцина сақлаш қоидалари рисоладагидек эмас. Бу муассасанинг қандай фаолият кўрсатаётганидан далолатдир.
Кейинги манзил Конимех тумани Зафаробод қўрғонидаги 35-сонли қишлоқ оилавий поликлиникаси бўлди. Ўрганиш жараёнида ўз ечимини кутаётган бир қатор камчиликлар аниқланди.
Бугунги кунда 5600 нафардан ортиқ фуқарога тиббий хизмат кўрсатиб келаётган мазкур муассасада педиатрия ва терапевт врачлар етишмайди. Поликлиника биноси таъмирталаб. Туман тиббиёт бирлашмаси раҳбари берган маълумотга кўра, мазкур тиббиёт муассасасини таъмирлаш бўйича вилоят ва туман ҳокимлигига бир неча бор мурожаат қилинган, аммо амалий ишлардан ҳалигача дарак йўқ.
Ишчи гуруҳи аъзолари томонидан аниқланган бу каби муаммолар халқ депутатлари Навоий вилоят сессияси ишида кўриладиган бўлди.
Изоҳ (0)