“Daryo” tugayotgan haftaning eng muhim yangiliklarini esga olib o‘tadi.
Samarqandlik 30 yashar ayolning ikki nafar farzandini qasddan o‘ldirishi o‘quvchilarni larzaga soldi. Ayol eri xorijda ishlagan vaqtida boshqa bir erkak bilan bo‘lgan yaqin munosabatini odamlarga sezdirib qo‘ymasligi uchun norasida go‘daklarini pichoqlab o‘ldirgani ma’lum bo‘ldi.
* * *
O‘zbekistonda yengil avtomobillar importi ikki barobarga o‘sgani ma’lum bo‘ldi. 2017-yilda O‘zbekiston import avtomobillariga 155 million dollar sarflagan bo‘lsa, 2018-yilda bu ko‘rsatkich 319 million dollarga yetgan. Bu milliy avtomobil kompaniyasi uchun quvonchli bo‘lmagan holat ekani shubhasizdir.
* * *
O‘zbekistonda pensiya yoshi oshirilishi mumkinligi xabar qilindi. Pensiya jamg‘armasi vakilining aytishicha, Sobiq Ittifoq davrining pensiya yoshi haqidagi qonuni, pensiya yoshi va talabi o‘sha-o‘shaligicha turibdi. Ammo 1990-yildan so‘ng postsovet davlatlari o‘z pensiya tizimini isloh qilgan. O‘zbekistonda pensiya yoshi ayollar uchun 55, erkaklar uchun 60 yoshni tashkil etadi. Bu MDH davlatlari orasida eng past ko‘rsatkich sanaladi.
* * *
Darvoqe, o‘tgan hafta ham uchtalik egizaklarga boy bo‘ldi. O‘zbek onalari farzand ko‘rish borasida ilg‘orlikni qo‘ldan bermoqchi emas. Qashqadaryo viloyatining Chiroqchi tumanida navbatdagi Shavkat, Miromon va Mirziyolar tavallud topdi. Hafta boshida esa Nukusda Jumamurotovlar oilasida uch nafar qizaloq dunyoga keldi.
* * *
O‘zbek harbiylari ilk bor Amerika zaminida harbiy mashg‘ulotlarni kuzatishga bordi. Ushbu tadbir nomi “Janubiy zarba” bo‘lib, Missisipi shtati milliy gvardiyasi tomonidan har yili o‘tkaziladi. O‘zbek harbiylari quruqlikdagi, suvdagi va havodagi qo‘shin turlarining qo‘shma harakatlari mashqini kuzatib mahorat oshiradi.
* * *
Braziliyalik mashhur futbol yulduzi, kuchli zarba egasi Roberto Karlos Toshkentga keldi. Roberto yosh futbolchilar uchun master-klass o‘tdi hamda faxriy futbolchilar ishtirokida o‘rtoqlik o‘yinida qatnashdi. Futbol yulduzi bilan uchrashuvlar tashkil qilindi.
* * *
30-yanvar — mustaqil O‘zbekistonning birinchi Prezidenti Islom Karimov tavallud topgan kun. Mamlakat rahbari Shavkat Mirziyoyev 30-yanvar kuni Toshkent shahrida Islom Karimov haykali poyiga gulchambar qo‘ydi. Shuningdek, Samarqand va Qashqadaryo viloyatlarida Islom Karimov xotirlandi.
* * *
Yanvar oyining oxirida rus telekanallari Yerga asteroid urilishi haqida tarqatgan xabari o‘quvchilar orasida, avvalgilaridan farqli ravishda, istehzoga sabab bo‘ldi. Chunki oldingi yillarda ham bir necha marotaba Yerga ulkan osmon jismi urilishi sanasi e’lon qilingan edi. O‘zbekiston Fanlar akademiyasi bu xabarga e’tibor qaratib, Yerga yaqinlashuvchi asteroidlarning harakati muntazam monitoring qilib borilishini, bu xabar esa batamom asossizligini bildirdi. Shuningdek, muftiy Usmonxon Alimov behuda gaplarga ishonmaslikka chaqirdi.
* * *
Shahrisabzning Ko‘l qishlog‘ida naq 2 metr balandlikda qor yog‘ishini juda ko‘pchilik kutmagan edi. Ushbu xabar “Daryo”da eng ko‘p ko‘rilgan xabarlardan biri bo‘ldi. Jurnalist Otabek Qo‘ldoshev Ko‘lga borib, barchasini ko‘zdan kechirib, qishloq aholisining og‘ir sharoiti haqida hikoya qiluvchi maqolani taqdim etdi. Maqolaga ilova etilgan fotosuratlarni ko‘rib, qishloq aholisining bardoshiga tassanno aytmay ilojingiz yo‘q.
* * *
Fevralning birinchi kunida futbol bo‘yicha Osiyo Kubogining final uchrashuvi bo‘lib o‘tdi. Unda Qatar Yaponiyani mag‘lub etib, o‘z tarixida birinchi marta Osiyo chempioni bo‘ldi. Qatarliklarning raqib darvozasiga yo‘llagan fantastik goli muxlislar tilida doston bo‘ldi. Aytish kerakki, final uchrashuvini o‘zbekistonlik mashhur hakam Ravshan Ermatov boshqardi.
Izoh (0)