«Дарё» тугаётган ҳафтанинг энг муҳим янгиликларини эсга олиб ўтади.
Самарқандлик 30 яшар аёлнинг икки нафар фарзандини қасддан ўлдириши ўқувчиларни ларзага солди. Аёл эри хорижда ишлаган вақтида бошқа бир эркак билан бўлган яқин муносабатини одамларга сездириб қўймаслиги учун норасида гўдакларини пичоқлаб ўлдиргани маълум бўлди.
* * *
Ўзбекистонда енгил автомобиллар импорти икки баробарга ўсгани маълум бўлди. 2017 йилда Ўзбекистон импорт автомобилларига 155 миллион доллар сарфлаган бўлса, 2018 йилда бу кўрсаткич 319 миллион долларга етган. Бу миллий автомобиль компанияси учун қувончли бўлмаган ҳолат экани шубҳасиздир.
* * *
Ўзбекистонда пенсия ёши оширилиши мумкинлиги хабар қилинди. Пенсия жамғармаси вакилининг айтишича, Собиқ Иттифоқ даврининг пенсия ёши ҳақидаги қонуни, пенсия ёши ва талаби ўша-ўшалигича турибди. Аммо 1990 йилдан сўнг посцовет давлатлари ўз пенсия тизимини ислоҳ қилган. Ўзбекистонда пенсия ёши аёллар учун 55, эркаклар учун 60 ёшни ташкил этади. Бу МДҲ давлатлари орасида энг паст кўрсаткич саналади.
* * *
Дарвоқе, ўтган ҳафта ҳам учталик эгизакларга бой бўлди. Ўзбек оналари фарзанд кўриш борасида илғорликни қўлдан бермоқчи эмас. Қашқадарё вилоятининг Чироқчи туманида навбатдаги Шавкат, Миромон ва Мирзиёлар таваллуд топди. Ҳафта бошида эса Нукусда Жумамуротовлар оиласида уч нафар қизалоқ дунёга келди.
* * *
Ўзбек ҳарбийлари илк бор Америка заминида ҳарбий машғулотларни кузатишга борди. Ушбу тадбир номи «Жанубий зарба» бўлиб, Миссисипи штати миллий гвардияси томонидан ҳар йили ўтказилади. Ўзбек ҳарбийлари қуруқликдаги, сувдаги ва ҳаводаги қўшин турларининг қўшма ҳаракатлари машқини кузатиб маҳорат оширади.
* * *
Бразилиялик машҳур футбол юлдузи, кучли зарба эгаси Роберто Карлос Тошкентга келди. Роберто ёш футболчилар учун мастер-класс ўтди ҳамда фахрий футболчилар иштирокида ўртоқлик ўйинида қатнашди. Футбол юлдузи билан учрашувлар ташкил қилинди.
* * *
30 январь — мустақил Ўзбекистоннинг биринчи Президенти Ислом Каримов таваллуд топган кун. Мамлакат раҳбари Шавкат Мирзиёев 30 январь куни Тошкент шаҳрида Ислом Каримов ҳайкали пойига гулчамбар қўйди. Шунингдек, Самарқанд ва Қашқадарё вилоятларида Ислом Каримов хотирланди.
* * *
Январь ойининг охирида рус телеканаллари Ерга астероид урилиши ҳақида тарқатган хабари ўқувчилар орасида, аввалгиларидан фарқли равишда, истеҳзога сабаб бўлди. Чунки олдинги йилларда ҳам бир неча маротаба Ерга улкан осмон жисми урилиши санаси эълон қилинган эди. Ўзбекистон Фанлар академияси бу хабарга эътибор қаратиб, Ерга яқинлашувчи астероидларнинг ҳаракати мунтазам мониторинг қилиб борилишини, бу хабар эса батамом асоссизлигини билдирди. Шунингдек, муфтий Усмонхон Алимов беҳуда гапларга ишонмасликка чақирди.
* * *
Шаҳрисабзнинг Кўл қишлоғида нақ 2 метр баландликда қор ёғишини жуда кўпчилик кутмаган эди. Ушбу хабар «Дарё»да энг кўп кўрилган хабарлардан бири бўлди. Журналист Отабек Қўлдошев Кўлга бориб, барчасини кўздан кечириб, қишлоқ аҳолисининг оғир шароити ҳақида ҳикоя қилувчи мақолани тақдим этди. Мақолага илова этилган фотосуратларни кўриб, қишлоқ аҳолисининг бардошига тассанно айтмай иложингиз йўқ.
* * *
Февралнинг биринчи кунида футбол бўйича Осиё Кубогининг финал учрашуви бўлиб ўтди. Унда Қатар Японияни мағлуб этиб, ўз тарихида биринчи марта Осиё чемпиони бўлди. Қатарликларнинг рақиб дарвозасига йўллаган фантастик голи мухлислар тилида достон бўлди. Айтиш керакки, финал учрашувини ўзбекистонлик машҳур ҳакам Равшан Эрматов бошқарди.
Изоҳ (0)