“Yoshlar press klubi”da O‘zbekiston yoshlar ittifoqining 2018-yildagi faoliyati yakunlariga bag‘ishlangan brifing bo‘lib o‘tdi. Bu haqda “Daryo”ga Yoshlar media markazi ma’lum qildi.
Unda Markaziy kengash raisining birinchi o‘rinbosari Alisher Sa’dullayev ittifoqning yillik sarhisobi yuzasidan batafsil ma’lumot berdi.
Sa’dullayevga ko‘ra, Ittifoq qoshida yoshlar tashabbuslari asosida 26 ta turli yo‘nalishdagi tashkilot faoliyati yo‘lga qo‘yildi. Jumladan, Yosh ijodkorlar kengashi, Imkoniyati cheklangan yoshlar va bolalar markazi, Yoshlarga ijtimoiy-psixologik xizmat ko‘rsatish markazi, Yoshlar nashriyot uyi, Yosh kinoijodkorlar kengashi, Yosh dizaynerlar kengashi, Yoshlar fermerlar kengashi, Yosh olimlar kengashlari shular jumlasidan.
Davlat rahbari farmoniga muvofiq, “Yoshlar – kelajagimiz” jamg‘armasi faoliyati yo‘lga qo‘yildi. Jamg‘armadan imtiyozli kredit olib, o‘z biznesini yo‘lga qo‘ygan 1066 nafar yosh fermerga 52 milliard so‘m, yosh tadbirkorlarning 4300 ta loyihasiga 226,6 milliard so‘m, jami 278,6 milliard so‘m 13 foizlik imtiyozli kreditlar ajratilishi ta’minlandi.
30-iyunda O‘zbekistonda ilk bor “Yoshlar kuni” keng nishonlandi. Shuningdek, ilk bor “Mard o‘g‘lon” davlat mukofoti hamda “Kelajak bunyodkori” medallari tengdoshlariga o‘rnak bo‘layotgan 42 nafar yigit-qizga topshirildi. 41 nafar yosh “O‘zbekiston belgisi” ko‘krak nishoniga loyiq topildi, yil davomida alohida faollik ko‘rsatgan 17 nafar yosh YoI mukofotini qo‘lga kiritdi. Prezident huzuridagi Davlat boshqaruvi akademiyasi qoshida tashkil etilgan Yoshlar muammolarini o‘rganish va istiqbolli kadrlarni tayyorlash institutida 500 nafarga yaqin tinglovchi tahsil olib, malaka oshirishga muvaffaq bo‘ldi.
Qurolli Kuchlar va huquqni muhofaza qilish organlari tizimida O‘zbekiston yoshlar ittifoqi boshlang‘ich tashkilotlari faoliyati yo‘lga qo‘yilib, harbiylar va tizimdagi yosh xizmatchilarning O‘zbekiston yoshlar ittifoqiga a’zo bo‘lish mexanizmining huquqiy asosi yaratildi. 2018—2021-yillarda qurilishi rejalashtirilgan 8 ming 600 ga yaqin ko‘p qavatli “Yoshlar uylari”dan 848 tasining kaliti yosh oilalarga topshirili.
O‘zbekiston yoshlari umumjahon assotsiatsiyasi faoliyati tashkil etilib, xorijda ishlayotgan, tahsil olayotgan o‘zbekistonlik yoshlarni ijtimoiy himoya qilish mexanizmi yaratildi.
Markaziy kengash raisining birinchi o‘rinbosarini ta’kidlashicha, Toshkent, Samarqand va Buxoro shaharlarida “O‘zbekiston—Rossiya yoshlar forumi” hamda 27—31-oktabr kunlari “O‘zbekiston—Rossiya yoshlar festivali” tashkil etildi.
Xorijiy davlatlarda ta’lim olayotgan va mehnat qilayotgan, asli kelib chiqishi o‘zbekistonlik bo‘lgan yoshlar ishtirokida 7—14-aprel kunlari “Yosh vatandoshlar” festivali o‘tkazilib, unga 18 ta davlatda istiqomat qiluvchi 56 nafar yosh vatandoshlar ishtirok etdi.
8—18-may kunlari Yoshlar ittifoqi ko‘magi asosida yosh kinoijodkorlar Fransiyada o‘tkazilgan 71-Kann xalqaro kinofestivalida ishtirok etib, unda ilk bor milliy pavilon tashkil etildi.
26—30-iyun kunlari Toshkent va Samarqandda “Markaziy Osiyo yoshlar forumi” yuqori saviyada o‘tkazildi.
Xitoyning Sindao shahrida Shanxay Hamkorlik Tashkilotiga a’zo davlatlarning Yoshlar kengashi yig‘ilishida O‘zbekiston delegatsiyasi ishtirok etib, YoI mazkur kengashga rasman a’zo bo‘lib kirdi.
Rossiya yoshlar ittifoqi taklifiga binoan 1—7-oktabr kunlari Moskva, Astraxan va Volgograd shaharlarida “III Rossiya – O‘zbekiston yoshlar forumi” hamda 2—14-oktabr kunlari Belgorod shahrida “Rossiya – O‘zbekiston yoshlar biznes inkubatori” tashkil etildi.
Termizdagi “Amudaryo” oromgohida Markaziy Osiyo yoshlarining “Do‘stlik forumi” o‘tkazildi.
Shuningdek, yosh kinoijodkorlarni qo‘llab-quvvatlash hamda xorijlik malakali mutaxassislar bilan tajriba almashishlariga imkoniyat yaratish maqsadida 27—30-noyabr kunlari IV PROlogue xalqaro kinofestivali bo‘lib o‘tdi.
O‘zbekiston yoshlar ittifoqi tomonidan 2018-yilda ko‘plab istiqboli loyihalar amalga oshirildi. Bu ishlar joriy 2019-yilda ham izchilik bilan davom ettiriladi.
Izoh (0)