16-yanvar, chorshanba kuni Marhamat tumanidagi Alitepa mahallasida jinoyat, fuqarolik, ma’muriy va iqtisodiy ishlar bo‘yicha Andijon viloyati sudlari raislari tomonidan sayyor qabul o‘tkazildi. Unda o‘ttizga yaqin fuqaroning hal etilmayotgan, yechimini topa olmayotgan muammolari tinglandi. Sudlar fuqarolarning muammolarini qonuniy tartibda hal etish bo‘yicha o‘zlarining yordam va maslahatlarini berdi. Bu haqda jurnalist Umidjon Mamarasulov xabar bermoqda.
Boboxuroson mahallasida yashovchi Muzaffar Shoyijonov Qirg‘izistonning O‘sh shahridagi Qirg‘iz-O‘zbek davlat universiteti kimyo-biologiya yo‘nalishini tamomlagan. Uning aytishicha, ayrim sabablarga ko‘ra, akasi ichki ishlar bo‘limining qidiruv bo‘limida ro‘yxatda turadi. Shu tufayli 21 yildan buyon ishsiz. Hech qayerga ishga olinmayapti.
— Bir necha tegishli joylarga murojaat qilganman, — deydi qabul davomida Muzaffar Shoyijonov. — Afsuski, hech qanday natija yo‘q. To‘g‘risi o‘tgan yilda tuman hokimligi tomonidan menga Polvontosh shaharchasidagi maktabga ishga joylashishim uchun yo‘llanma berishganda quvongandim. Biroq xalq ta’limi bo‘limidagilar “kommisiya kelib qolsa, nima deymiz?” deya rad javobini berganidan keyin “tarvuzim qo‘ltig‘imdan tushdi”. Axir men ham boshqalar qatori ishlashni, shu yurt, uning rivoji uchun xissa qo‘shishni istayman.
Murojaatni o‘rgangan jinoyat ishlari bo‘yicha viloyat sudi raisi Vohidjon Nazarovning ma’lum qilishicha, tuman prokurori murojaatchi o‘zi yashayotgan hududdagi maktabga ishga joylashtirilishini bildirgan.
— Yoshlik qilib katta xato qilganman, — deydi Fayoziddin Umrzoqov. — Jinoyat jazosiz qolmaydi deganlaridek, umrimning 10 yilini, ya’ni oltin davrini qamoqda o‘tkazdim. O‘tgan yilning iyun oylarida ozodlikka chiqdim. Mana olti oydirki ishsizman. Ikki marotaba bandlikka ko‘maklashish markaziga bordim. Chiqib qolsa aytamiz, deyishdi. Shuncha kutdim, bo‘lmadi. Hayotimning qolgan qismini ham zalolatda o‘tkazish niyatim yo‘q. Shuning uchun ishlamasam bo‘lmaydi. Haydovchilik guvohnomam bor, hech bo‘lmasam haydovchi bo‘lib ishga joylashsam yaxshi bo‘lardi.
Qabulda fuqaro Umrzoqovga murojaati tegishli tashkilotlar bilan birga o‘rganilib, natijasi qisqa muddatda ma’lum qilinishi tushuntirildi.
Izoh (0)