16 январь, чоршанба куни Марҳамат туманидаги Алитепа маҳалласида жиноят, фуқаролик, маъмурий ва иқтисодий ишлар бўйича Андижон вилояти судлари раислари томонидан сайёр қабул ўтказилди. Унда ўттизга яқин фуқаронинг ҳал этилмаётган, ечимини топа олмаётган муаммолари тингланди. Судлар фуқароларнинг муаммоларини қонуний тартибда ҳал этиш бўйича ўзларининг ёрдам ва маслаҳатларини берди. Бу ҳақда журналист Умиджон Мамарасулов хабар бермоқда.
Бобохуросон маҳалласида яшовчи Музаффар Шойижонов Қирғизистоннинг Ўш шаҳридаги Қирғиз-Ўзбек давлат университети кимё-биология йўналишини тамомлаган. Унинг айтишича, айрим сабабларга кўра, акаси ички ишлар бўлимининг қидирув бўлимида рўйхатда туради. Шу туфайли 21 йилдан буён ишсиз. Ҳеч қаерга ишга олинмаяпти.
— Бир неча тегишли жойларга мурожаат қилганман, — дейди қабул давомида Музаффар Шойижонов. — Афсуски, ҳеч қандай натижа йўқ. Тўғриси ўтган йилда туман ҳокимлиги томонидан менга Полвонтош шаҳарчасидаги мактабга ишга жойлашишим учун йўлланма беришганда қувонгандим. Бироқ халқ таълими бўлимидагилар «коммисия келиб қолса, нима деймиз?» дея рад жавобини берганидан кейин «тарвузим қўлтиғимдан тушди». Ахир мен ҳам бошқалар қатори ишлашни, шу юрт, унинг ривожи учун хисса қўшишни истайман.
Мурожаатни ўрганган жиноят ишлари бўйича вилоят суди раиси Воҳиджон Назаровнинг маълум қилишича, туман прокурори мурожаатчи ўзи яшаётган ҳудуддаги мактабга ишга жойлаштирилишини билдирган.
— Ёшлик қилиб катта хато қилганман, — дейди Фаёзиддин Умрзоқов. — Жиноят жазосиз қолмайди деганларидек, умримнинг 10 йилини, яъни олтин даврини қамоқда ўтказдим. Ўтган йилнинг июнь ойларида озодликка чиқдим. Мана олти ойдирки ишсизман. Икки маротаба бандликка кўмаклашиш марказига бордим. Чиқиб қолса айтамиз, дейишди. Шунча кутдим, бўлмади. Ҳаётимнинг қолган қисмини ҳам залолатда ўтказиш ниятим йўқ. Шунинг учун ишламасам бўлмайди. Ҳайдовчилик гувоҳномам бор, ҳеч бўлмасам ҳайдовчи бўлиб ишга жойлашсам яхши бўларди.
Қабулда фуқаро Умрзоқовга мурожаати тегишли ташкилотлар билан бирга ўрганилиб, натижаси қисқа муддатда маълум қилиниши тушунтирилди.
Изоҳ (0)