O‘zbekistonda Creative Spark loyihasining eng yaxshi ishtirokchisi Londonga boradi. Bu haqda “Daryo”ga Innovatsion rivojlanish vazirligi matbuot xizmati ma’lum qildi.
Creative Spark Buyuk Britaniya hamda Markaziy Osiyo, Janubiy Kavkaz davlatlari va Ukraina universitetlari, ta’lim muassasalari o‘rtasida faol tadbirkorlik sohalarini rivojlantirish bo‘yicha xalqaro aloqalarni rivojlantirishga qaratilgan besh yillik dastur bo‘lib, talabalarda faol tadbirkorlik va tashabbuskorlik ko‘nikmalarini shakllantirgan holda, jamiyatda kreativ iqtisodiyotni rivojlantirishga hissa qo‘shishni asosiy maqsad qilib olgan.
Kreativ iqtisod O‘zbekiston uchun yangilik bo‘lgani bois bu ko‘nikmalarni mahalliy oliy ta’lim muassasalari talabalari ichida keng targ‘ib qilishda Innovatsion rivojlanish vazirligi yaqindan ko‘mak berish barobarida treninglar, o‘quv va amaliy mashg‘ulotlar, mahorat darslari o‘tkazishda ko‘mak beradi. O‘quvchilar darslarda orqali faol tadbirkorlik faoliyatini yuritish uchun amaliy ko‘nikmalarni qo‘lga kiritib, kelgusida mamlakatning iqtisodiy ravnaqiga o‘z hissalarini qo‘shadilar.
Loyiha davomida joriy yilning yanvar—mart oylarida London Metropolitan University xodimlari va hamkor tashkilotlar mutaxassislari tomonidan faol tadbirkorlik loyihalarini tayyorlash bo‘yicha treninglar tashkil etiladi. Treninglarda faol qatnashgan talabalar o‘z startap loyihalarini maxsus komissiyaga taqdim etadilar. Eng yaxshi loyihalar saralab olinib, loyiha mualliflari londonlik ekspertlar tomonidan tashkil etiladigan o‘quv kursida qatnashadi va o‘z loyihalarini yanada rivojlantirish imkoniyatiga ega bo‘ladi.
Iyun oyida loyihalarning yakuniy saralash bosqichi o‘tkaziladi va eng yaxshi loyiha egasi o‘z loyihasini London shahrida investorlarga taqdim etadi. Safar xarajatlari Britaniya kengashining Creative Spark uchun maxsus ajratilgan fondi tomonidan qoplanadi. Shuningdek, faol ishtirokchilar Britaniya kengashi va hamkor tashkilotlar tomonidan rag‘batlantiriladi.
Izoh (0)