So‘nggi paytlarda ommaviy axborot vositalari, xususan, ijtimoiy tarmoqlarda is gazidan zaharlanish bilan bog‘liq hodisalar haqidagi xabarlar ko‘p tarqalmoqda, deb yozadi O‘zA.
Jumladan, Toshkent viloyatining O‘rta Chirchiq, keyinroq Quyi Chirchiq tumanida, sal avval esa Zangiota tumanida birvarakayiga 5 nafar voyaga yetmagan bolaning is gazidan zaharlanib, vafot etgani to‘g‘risidagi xabarlar tarqaldi. Xo‘sh, viloyatda haqiqatan ham is gazidan zaharlanish bilan bog‘liq baxtsiz hodisalar ko‘paydimi?
Olmaliq shahrida aholi o‘rtasida is gazidan zaharlanish, gaz-havo aralashmasining chaqnashi bilan bog‘liq baxtsiz hodisalarning oldini olish, mahallalarda bu borada olib borilayotgan targ‘ibot-tashviqot ishlarini yanada kuchaytirish maqsadida o‘tkazilgan seminarda shu haqda so‘z bordi.
Fuqarolarning o‘zini o‘zi boshqarish organlari faoliyatini muvofiqlashtirish bo‘yicha Toshkent viloyati kengashi tomonidan tashkil etilgan muloqotda viloyat hokimligi, favqulodda vaziyatlar, ichki ishlar boshqarmalari, gaz ta’minoti korxonalari mas’ul xodimlari, mahalla faollari ishtirok etdi.
Mamlakatda, jumladan, Toshkent viloyatida ham aholining is gazidan zaharlanishining oldini olish maqsadida viloyatning har bir mahallasida ishchi guruhlar tuzilib, 1 ming 10 ta guruhga jalb etilgan 5 ming 500 nafardan ziyod mutaxassis tomonidan keng ko‘lamli profilaktika va targ‘ibot-tashviqot tadbirlari o‘tkazib kelinayotir. Shunga qaramay, ayrim fuqarolarning ehtiyotsizligi, yong‘in xavfsizligi qoidalariga rioya etmasligi oqibatida is gazidan zaharlanish bilan bog‘liq baxtsiz hodisalar ro‘y berayotgani, aslida ushbu holat bilan bog‘liq bitta baxtsizlik ham ko‘p ekani alohida qayd etildi.
Sovuq kunlar boshlandi, deguncha aholining tabiiy gazga bo‘lgan ehtiyoji har doimgidan ham ortadi. Xonadonlarni isitish muammosi tufayli gazdan maqsadsiz foydalanish va yong‘in xavfsizligi qoidalarini buzish holatlari ko‘payadi. Bu esa, o‘z navbatida, gazdan zaharlanish bilan bog‘liq baxtsiz hodisalar ko‘payishiga olib keladi. Jumladan, yuqorida qayd etilgan baxtsiz hodisalar ham ayni shu sababdan yuzaga kelgan.
Amaliy mashg‘ulotda aholi is gazidan zaharlanishining oldini olish, bu borada mahallalarda olib borilayotgan profilaktika, targ‘ibot-tashviqot ishlarini yanada kuchaytirish, viloyatning har bir tuman va shaharlarida is gazidan zaharlanishning oldini olishga qaratilgan seminarlar o‘tkazilishiga kelishib olindi.
Izoh (0)