Сўнгги пайтларда оммавий ахборот воситалари, хусусан, ижтимоий тармоқларда ис газидан заҳарланиш билан боғлиқ ҳодисалар ҳақидаги хабарлар кўп тарқалмоқда, деб ёзади ЎзА.
Жумладан, Тошкент вилоятининг Ўрта Чирчиқ, кейинроқ Қуйи Чирчиқ туманида, сал аввал эса Зангиота туманида бирваракайига 5 нафар вояга етмаган боланинг ис газидан заҳарланиб, вафот этгани тўғрисидаги хабарлар тарқалди. Хўш, вилоятда ҳақиқатан ҳам ис газидан заҳарланиш билан боғлиқ бахтсиз ҳодисалар кўпайдими?
Олмалиқ шаҳрида аҳоли ўртасида ис газидан заҳарланиш, газ-ҳаво аралашмасининг чақнаши билан боғлиқ бахтсиз ҳодисаларнинг олдини олиш, маҳаллаларда бу борада олиб борилаётган тарғибот-ташвиқот ишларини янада кучайтириш мақсадида ўтказилган семинарда шу ҳақда сўз борди.
Фуқароларнинг ўзини ўзи бошқариш органлари фаолиятини мувофиқлаштириш бўйича Тошкент вилояти кенгаши томонидан ташкил этилган мулоқотда вилоят ҳокимлиги, фавқулодда вазиятлар, ички ишлар бошқармалари, газ таъминоти корхоналари масъул ходимлари, маҳалла фаоллари иштирок этди.
Мамлакатда, жумладан, Тошкент вилоятида ҳам аҳолининг ис газидан заҳарланишининг олдини олиш мақсадида вилоятнинг ҳар бир маҳалласида ишчи гуруҳлар тузилиб, 1 минг 10 та гуруҳга жалб этилган 5 минг 500 нафардан зиёд мутахассис томонидан кенг кўламли профилактика ва тарғибот-ташвиқот тадбирлари ўтказиб келинаётир. Шунга қарамай, айрим фуқароларнинг эҳтиётсизлиги, ёнғин хавфсизлиги қоидаларига риоя этмаслиги оқибатида ис газидан заҳарланиш билан боғлиқ бахтсиз ҳодисалар рўй бераётгани, аслида ушбу ҳолат билан боғлиқ битта бахтсизлик ҳам кўп экани алоҳида қайд этилди.
Совуқ кунлар бошланди, дегунча аҳолининг табиий газга бўлган эҳтиёжи ҳар доимгидан ҳам ортади. Хонадонларни иситиш муаммоси туфайли газдан мақсадсиз фойдаланиш ва ёнғин хавфсизлиги қоидаларини бузиш ҳолатлари кўпаяди. Бу эса, ўз навбатида, газдан заҳарланиш билан боғлиқ бахтсиз ҳодисалар кўпайишига олиб келади. Жумладан, юқорида қайд этилган бахтсиз ҳодисалар ҳам айни шу сабабдан юзага келган.
Амалий машғулотда аҳоли ис газидан заҳарланишининг олдини олиш, бу борада маҳаллаларда олиб борилаётган профилактика, тарғибот-ташвиқот ишларини янада кучайтириш, вилоятнинг ҳар бир туман ва шаҳарларида ис газидан заҳарланишнинг олдини олишга қаратилган семинарлар ўтказилишига келишиб олинди.
Изоҳ (0)