O‘zbekiston Madaniyat vazirligi markaziy apparat tarkibiga kiruvchi boshqarma rahbarlari va jurnalistlar ishtirokida 8-yanvar kuni bo‘lib o‘tgan konferensiyada Qoraqalpog‘istondagi Shamun Nabiy maqbarasi buzib tashlanganligi faktini tasdiqladi.
“Novosti Uzbekistana” internet-nashrining muxbiri Yevgeniy Grandening sayyor komissiyaning ishlari va o‘tkazilgan tarixiy-badiiy, tarixiy-me’moriy ekspertizalarning natijalari haqidagi savoliga madaniyat vazirining o‘rinbosari Kamola Akilova XII asr me’morchiligi tarixiy yodgorligining buzib tashlanganligi fakti, afsuski, tasdiqlanganligini ma’lum qildi.
“Shamun Nabiy maqbarasi joyida binoning yangi nusxasi barpo etildi. Bu 2017-yilda amalga oshirildi”, — dedi Kamola Akilova.
Tarixiy yodgorlik endi yo‘qligi haqidagi birinchi ma’lumot OAVlarida o‘tgan yilning oktabrida paydo bo‘ldi. O‘zbekiston Respublikasi Madaniyat vazirligi Tarixiy meros obyektlarini qo‘riqlash bo‘yicha bosh ilmiy-ishlab chiqarish boshqarmasi Qoraqalpog‘iston Respublikasi bo‘yicha mintaqaviy davlat inspeksiyasi rahbari Quanishbek Sharipov “Xalq so‘zi Online” nashriga bergan izohida binoning buzib tashlanishini majburiy chora deb atagan. Uning so‘zlariga qaraganda, ikki gumbaz deyarli to‘liq vayron bo‘lgan, paxsa devorlar yupqalashib ketgan. Sharipovning fikricha, yodgorlikni dastlabki ko‘rinishida qoldirish vaqt o‘tishi bilan uning to‘liq vayron bo‘lishini anglatar edi.
“Tashkil etilgan komissiya joyida bo‘lib, maqbaraning yangi binosini barpo etish bo‘yicha ishlarni o‘tkazish haqida qaror qabul qildi. Ular ‘Meros chashmasi’ loyiha tashkiloti tomonidan olib borildi. Qurilish ishlari o‘tgan yilning bahorida boshlanib, yangi devorlar, gumbazlarni barpo etish, hududni obodonlashtirish, bahodir Shamun Nabiy dafn etilgan dahmani rekonstruksiya qilishni o‘z ichiga oldi”, — deydi Quanishbek Sharipov.
Shamun Nabiy maqbarasining buzilganligi haqidagi ma’lumotni arxeolog, tarix fanlari nomzodi Oktabr Dospanov ham tasdiqladi. Maqbara 1964-yilda Nukus chekka qismidagi qazishma ishlari davomida topilgan edi.
“Maqbara buzib tashlanishini tushunganimizda, buning oldini olishga urindik, biroq bizga barcha ruxsatlarni o‘z ichiga olgan hujjatlarning naq bir papkasini ko‘rsatishdi”, — dedi Oktabr Dospanov.
Binoni buzish va yangisini barpo etishga aylangan rekonstruksiyaga ruxsat Madaniyat vazirligi tomonidan berilgan. Yodgorlikni “yangilash” bilan Quanish Sharipov shug‘ullangan.
Biroq boshqarmaning o‘zi turli OAVlaridagi maqolalardan so‘ng Shamun Nabiy maqbarasining buzilganligini rad etib keldi. 2018-yilning noyabr oyi boshida madaniyat vaziri deyarli yopiq matbuot anjumanini o‘tkazib, unda vazir o‘rinbosari Kamola Akilova maqbarani hech kim buzib tashlamaganligi, u vayron bo‘lmasligi uchun yangi qurilma bilan qoplanganligini ma’lum qilgan edi. Tarixiy ahamiyat yo‘qotilganligi fakti qisman tan olindi, sababi Shamun Nabiy Mizdakxon majmuasining bir qismi edi.
O‘shanda boshqarma maxsus komissiya tashkil etilib, u O‘zbekistonning barcha shaharlarini aylanib chiqishi va har bir yodgorlikni ko‘zdan kechirishi hamda o‘z tavsiyalarini berishini ma’lum qilgan edi.
Nukusga qilingan safardan so‘ng vazirlik yuz bergan hodisada aybdorlar qonunchilikka muvofiq jazoga tortilishini ta’kidladi.
Izoh (0)