O‘zbekistonda namunaviy vaqtinchalik bir martalik ish bilan ta’minlash byurolari tashkil etiladi

Bugungi kunda Bandlik va mehnat munosabatlari vazirligi tizimida 28 ta Vaqtinchalik bir martalik ish bilan ta’minlash byurosi faoliyat yuritmoqda. Ular o‘zini oqlayaptimi? O‘zA bu savol bilan Bandlik va mehnat munosabatlari vaziri Sherzod Kudbiyevga murojaat qildi.

Vazirga ko‘ra, Vaqtinchalik bir martalik ishlarni bajaruvchi fuqarolarning mehnat faoliyatini tartibga solish, zarur ijtimoiy-maishiy shart-sharoitlar yaratish va ularni ishga joylashtirishga ko‘maklashish yo‘nalishidagi ishlarni yanada soddalashtirish yuzasidan 2019-yilda vazirlik tomonidan quyidagi ishlar rejalashtirilmoqda:

Vaqtinchalik bir martalik ish bilan ta’minlash byurolari orqali bandlikni ta’minlash yuzasidan 2019-yilda Dastur qabul qilish;

Zamonaviy tipdagi Vaqtinchalik bir martalik ish bilan ta’minlash byurolarni tashkil etish, xususan, Toshkent shahrida 3 ta va viloyatlarda 1 tadan namunaviy byurolarni tashkil etish;

Norasmiy faoliyat yuritib kelayotgan vaqtinchalik bir martalik ish bilan ta’minlash markazlarga yuridik maqom berish, strukturasi va shtat birliklarini belgilab berish;

Xalqaro tajribani o‘rgangan holda “freelancer” tizimini joriy etish. Bunda, vaqtinchalik bir martalik ish izlashda onlayn tizimi orqali ish qidiruvchilar qulay tarzda ish topish imkoniyatiga ega bo‘ladi, shuningdek, ayniqsa, xotin-qizlarning uy sharoitida ishlash imkoniyati paydo bo‘ladi;

Byurolarda ehtiyojdan kelib chiqqan holda qo‘shimcha ravishda ijtimoiy-maishiy (oshxona, somsaxona, sartaroshxona poyabzal tuzatish ustaxonasi va boshqalar) bino-inshootlar qurish, xodimlarni rag‘batlantirish va moddiy-texnik bazasini yaxshilash uchun talab etiladigan xarajatlar Bandlikka ko‘maklashish davlat jamg‘armasi mablag‘lari hisobidan amalga oshiriladi.

Shu bilan birgalikda, ushbu muammoni hal etishning ijtimoiy-iqtisodiy ahamiyatini hisobga olib, haq to‘lanadigan jamoat ishlariga respublika byudjetidan 2019-yilda 450 milliard so‘m mablag‘ ajratilishi rejalashtirilmoqda.

Ish qidirayotgan shaxslarga ish tanlash va ishga joylashish, ish beruvchilar uchun kadrlar tanlash bo‘yicha xizmatlar ko‘rsatish, shuningdek, ishga joylashtirish sohasida axborot va maslahat xizmatlari ko‘rsatuvchi 30 ta xususiy bandlik agentliklari tashkil etildi va vazirlik tomonidan xususiy bandlik agentliklari reyestridan o‘tkazish davom etmoqda.