Бугунги кунда Бандлик ва меҳнат муносабатлари вазирлиги тизимида 28 та Вақтинчалик бир марталик иш билан таъминлаш бюроси фаолият юритмоқда. Улар ўзини оқлаяптими? ЎзА бу савол билан Бандлик ва меҳнат муносабатлари вазири Шерзод Кудбиевга мурожаат қилди.
Вазирга кўра, Вақтинчалик бир марталик ишларни бажарувчи фуқароларнинг меҳнат фаолиятини тартибга солиш, зарур ижтимоий-маиший шарт-шароитлар яратиш ва уларни ишга жойлаштиришга кўмаклашиш йўналишидаги ишларни янада соддалаштириш юзасидан 2019 йилда вазирлик томонидан қуйидаги ишлар режалаштирилмоқда:
Вақтинчалик бир марталик иш билан таъминлаш бюролари орқали бандликни таъминлаш юзасидан 2019 йилда Дастур қабул қилиш;
Замонавий типдаги Вақтинчалик бир марталик иш билан таъминлаш бюроларни ташкил этиш, хусусан, Тошкент шаҳрида 3 та ва вилоятларда 1 тадан намунавий бюроларни ташкил этиш;
Норасмий фаолият юритиб келаётган вақтинчалик бир марталик иш билан таъминлаш марказларга юридик мақом бериш, структураси ва штат бирликларини белгилаб бериш;
Халқаро тажрибани ўрганган ҳолда «фрееланcер» тизимини жорий этиш. Бунда, вақтинчалик бир марталик иш излашда онлайн тизими орқали иш қидирувчилар қулай тарзда иш топиш имкониятига эга бўлади, шунингдек, айниқса, хотин-қизларнинг уй шароитида ишлаш имконияти пайдо бўлади;
Бюроларда эҳтиёждан келиб чиққан ҳолда қўшимча равишда ижтимоий-маиший (ошхона, сомсахона, сартарошхона пойабзал тузатиш устахонаси ва бошқалар) бино-иншоотлар қуриш, ходимларни рағбатлантириш ва моддий-техник базасини яхшилаш учун талаб этиладиган харажатлар Бандликка кўмаклашиш давлат жамғармаси маблағлари ҳисобидан амалга оширилади.
Шу билан биргаликда, ушбу муаммони ҳал этишнинг ижтимоий-иқтисодий аҳамиятини ҳисобга олиб, ҳақ тўланадиган жамоат ишларига республика бюджетидан 2019 йилда 450 миллиард сўм маблағ ажратилиши режалаштирилмоқда.
Иш қидираётган шахсларга иш танлаш ва ишга жойлашиш, иш берувчилар учун кадрлар танлаш бўйича хизматлар кўрсатиш, шунингдек, ишга жойлаштириш соҳасида ахборот ва маслаҳат хизматлари кўрсатувчи 30 та хусусий бандлик агентликлари ташкил этилди ва вазирлик томонидан хусусий бандлик агентликлари реестридан ўтказиш давом этмоқда.
Изоҳ (0)