O‘zbekiston sud-huquq tizimida amalga oshirilayotgan islohotlar jarayonida jazoni yengillashtirish, jazoni o‘tash muassasalarini xalqaro huquq me’yor va talablariga moslashtirishga alohida e’tibor qaratilmoqda, deb yozadi O‘zA.
Jizzax shahrida shu talablar asosida ma’muriy qamoqqa olingan shaxslarni qabul qilish va saqlash uchun mo‘ljallangan maxsus qabulxona ochildi.
60 o‘rinli ushbu maxsus qabulxonada ma’muriy qamoqqa olingan shaxslarning yashashi uchun zarur sharoitlar yaratilgan. Yotoqxona, tibbiyot, yuvinish, dezinfeksiya va ovqatlanish xonalari, kutubxona barcha kerakli buyumlar bilan jihozlangan. Muassasada fuqarolarning yaqinlari va advokatlar bilan uchrashishi hamda yuridik yordam olishi uchun yetarli sharoit yaratilgan.
– Muassasadagi sharoitlar yurtimizda inson huquq va erkinliklari ustuvorligini ta’minlash talablaridan kelib chiqib yaratilgan, – deydi Jizzax viloyati IIB Patrul-post xizmati va jamoat tartibini saqlash boshqarmasi boshlig‘i, podpolkovnik Hamza Salayev. – Chunki asosiy maqsad maxsus qabulxonaga joylashtirilgan shaxslarni jazolash emas, balki to‘g‘ri yo‘lga solishdir. Shu ma’noda profilaktik tadbirlar faoliyatimiz negizini tashkil qiladi.
Qabulxonaning ochilishi munosabati bilan o‘tkazilgan tadbirda ishtirok etgan huquqni himoya qilish idoralari, jamoatchilik vakillari muassasa jazoni o‘tashga oid xalqaro huquq me’yorlariga to‘liq javob berishini qayd etdi.
Izoh (0)