Ўзбекистон суд-ҳуқуқ тизимида амалга оширилаётган ислоҳотлар жараёнида жазони енгиллаштириш, жазони ўташ муассасаларини халқаро ҳуқуқ меъёр ва талабларига мослаштиришга алоҳида эътибор қаратилмоқда, деб ёзади ЎзА.
Жиззах шаҳрида шу талаблар асосида маъмурий қамоққа олинган шахсларни қабул қилиш ва сақлаш учун мўлжалланган махсус қабулхона очилди.
60 ўринли ушбу махсус қабулхонада маъмурий қамоққа олинган шахсларнинг яшаши учун зарур шароитлар яратилган. Ётоқхона, тиббиёт, ювиниш, дезинфекция ва овқатланиш хоналари, кутубхона барча керакли буюмлар билан жиҳозланган. Муассасада фуқароларнинг яқинлари ва адвокатлар билан учрашиши ҳамда юридик ёрдам олиши учун етарли шароит яратилган.
– Муассасадаги шароитлар юртимизда инсон ҳуқуқ ва эркинликлари устуворлигини таъминлаш талабларидан келиб чиқиб яратилган, – дейди Жиззах вилояти ИИБ Патруль-пост хизмати ва жамоат тартибини сақлаш бошқармаси бошлиғи, подполковник Ҳамза Салаев. – Чунки асосий мақсад махсус қабулхонага жойлаштирилган шахсларни жазолаш эмас, балки тўғри йўлга солишдир. Шу маънода профилактик тадбирлар фаолиятимиз негизини ташкил қилади.
Қабулхонанинг очилиши муносабати билан ўтказилган тадбирда иштирок этган ҳуқуқни ҳимоя қилиш идоралари, жамоатчилик вакиллари муассаса жазони ўташга оид халқаро ҳуқуқ меъёрларига тўлиқ жавоб беришини қайд этди.
Изоҳ (0)