O‘simta tufayli falajlanib qolgan, moddiy tomondan qiyinchilikka uchragani sabab xayriya aksiyasi orqali to‘plangan mablag‘ evaziga Turkiyada jarrohlik amaliyotini boshidan o‘tkazgan qashqadaryolik shoira qiz Baxtiniso Mahmudova olamdan o‘tdi.
Turkiyalik professorlar Baxtinisoning orqa miyasidagi o‘simtani o‘rganishib, bu o‘simtaning xavfsiz turi ekanini, olib tashlanganidan keyin ortiq bezovta qilmasligini, o‘smasligini aytishgan edi. Shu sababli o‘tgan yilning dekabr oyida internet tarmoqlarida Baxtinisoning operatsiyasi uchun kerak bo‘ladigan — 30 ming AQSh dollari miqdorida mablag‘ni yig‘ish bo‘yicha xayriya aksiyasi o‘tkazilgandi.
Zarur mablag‘ yig‘ilganidan so‘ng, 17-dekabr kuni Baxtiniso Turkiya safariga uchib ketgan va 20-dekabr kuni jarrohlik amaliyoti o‘tkazilgan.
Bugun, 6-yanvar kuni Baxtiniso Mahmudovaning yaqinlarini ma’lum qilishicha, Baxtiniso yorug‘ olamni tark etgan.
“Bu xabarga ishongim kelmadi. Qon bosimi tushib ketdi bir necha martalab deyishyapti. Xudoning ishi. Baxtiniso Rumiyni qattiq yaxshi ko‘rardi. Rumiy yurtida o‘tdi. Beg‘ubor yashadi shu qiz. Telegram’dagi shaxsiy yozishmalarga qaradim. O‘pkam to‘ldi”, — deydi Yozuvchilar uyushmasining a’zosi Bobur Elmurodov.
Izoh (0)