Toshkentda Yangi yil tomoshasiga kelgan 2 yoshli qizaloqning hayoti saqlab qolindi
Toshkentda Mustaqillik ko‘chasidagi Yangi yil bayramiga bag‘ishlangan tantanalarini tomosha qilishga kelgan ikki yoshli qizaloqning sog‘ligi yomonlashib qolgan. Bu haqda IIV xabar berdi.
Surunkali xuruj tufayli o‘zini yo‘qotgan qizaloq va nima qilishini bilmay qolgan onaga ikki nafar ichki ishlar organlari xodimlari birinchi tibbiy yordam ko‘rsatgan va “tez yordam”ga xabar bergan. Shifokorlar yetib kelgach, qizaloqqa o‘z vaqtida zarur yordam ko‘rsatilganini e’tirof etgan.
Ayni vaqtda qizaloq shifoxonada mutaxassislar nazorati ostida. Hozir u o‘zini yaxshi his qilmoqda.
IIV Jamoatchilik va ommaviy axborot vositalari bilan aloqalar boshqarmasidan ma’lum qilishlaricha, xizmat burchiga vijdonan va sidqidildan yondashgan, go‘dak hayotini asrab qolgan polkovnik Murodilla Aliqoriyev va leytenant Farruh Obidovlar Ichki ishlar vazirligining qimmatbaho sovg‘asi bilan taqdirlangan.
