Kremldagilar AQShning Buenos-Ayresda Tramp bilan Putinning uchrashuvini bekor qilish haqidagi qaroridan afsusda, deb xabar beradi “Exo Moskvi”.
Rossiya prezidenti matbuot kotibi Dmitriy Peskovning aytishicha, bu jiddiy xalqaro va ikki tomonlama masalalar muhokamasi noma’lum vaqtga kechiktirilishini anglatadi.
Shu bilan birga, dedi Peskov, Putin amerikalik hamkasbi bilan muloqotga tayyor.
AQSh prezidenti Donald Trampning Rossiya prezidenti Vladimir Putin bilan uchrashuvni bekor qilishini oldindan aytish mumkin edi, deb hisoblaydi Federatsiya Kengashi xalqaro masalalar qo‘mitasi a’zosi Andrey Klimov. Uning so‘zlariga ko‘ra, Trampning Putin bilan uchrashuvdan voz kechishi u uchun kutilmagan holat bo‘lmagan.
Avvalroq AQSh prezidenti Donald Tramp Rossiya davlati rahbari Vladimir Putin bilan Argentinadagi G20 sammiti doirasida o‘tkazilishi rejalashtirilgan uchrashuvni bekor qilgan, bunday qarorni u Kerch bo‘g‘ozida 25-noyabr, yakshanba kuni sodir bo‘lgan hodisa bo‘yicha ma’ruza bilan tanishib chiqqanidan keyin hamda Ukraina kemalari va dengizchilari vataniga qaytmagani sababli qabul qilganini aytgan edi.
Izoh (0)