Sirdaryo viloyatida bo‘lib o‘tgan “fermerlar qasamyodi” ezgu maqsadlarga erishish niyatida amalga oshirilgan bo‘lishi mumkin. Lekin bu qanchalik to‘g‘ri bo‘ldi va bu qasamyod bilan qishloq xo‘jaligidagi bugungi ahvolni yaxshilab bo‘ladimi? Oliy Majlis Senati a’zosi, XDP Markaziy Kengashi raisi o‘rinbosari Maqsuda Vorisova shu haqda fikr yuritgan.
Senatorga ko‘ra, qasamyod – harbiy yoki boshqa shu turdagi xizmatga kirayotganda, ma’lum bir statusni olayotganda (masalan, fuqarolik olayotganda yoki sudda guvohlik berayotganda), lavozimga tayinlanayotgandagi rasmiy va tantanali ont ichish marosimi. Qasamyod faqat ommaviy tarzda (omma ko‘z o‘ngida) amalga oshiriladi va qasamyod qiluvchiga uni — qasamyodni ado etmagani uchun yuridik javobgarlikni yuklaydi.
Demokratik tuzumlarda qasamyod mas’uliyat hajmi ulkan bo‘lgan, mas’uliyatsizlik oqibatida jamiyat katta talofat ko‘rishi mumkin bo‘lgan holatlarda hamda sudda haqiqatni yuzaga chiqarishga safarbar etilgan idoradagina qo‘llanadi.
“Amaldagi qonunchilikka ko‘ra fermer bu tadbirkor. U qishloq xo‘jalik mahsulotlari yetishtiradi va o‘z faoliyatini bozor talablari asosida yuritishi kerak. Fermerga qasam ichirish bilan biz unga ma’naviy cheklov qo‘ymoqdamiz, dehqonni qasamga tayantirish jamiyatimiz rivoji uchun foyda keltiradimi yoki zarar?
Bu holat rahbariyat oldida yangilik yaratib, obro‘ olishga urinish emasmi?
Qishloq xo‘jaligidagi salbiy holatlar sanoqli bo‘lsa barchaga ommaviy qasam ichirish zarurmi? Agar bunday holatlar ko‘p bo‘lsa, unda ularni keltirib chiqargan sabablarni tahlil qilish, tizimli choralar ko‘rilishi kerak-ku!
Fermerlarning bu yilgi noqulay sharoitda mo‘ljaldagi hosilni yetishtira olmaganligi uchun nafaqat ob-havo yoki dehqonning dangasaligi, uddaburon emasligi aybdor emas, balki ishni tashkil qilishdagi tizimli kamchiliklar sabab bo‘lgan. Tumanlarda bo‘lib, fermerlar, tajribali dexqonlar bilan suxbatlashib quyidagi sabablarni aniqladik. Ya’ni, fermerlarda zarur darajada bilim yetishmasligi, texnikalar eskirgani yoki yetishmasligi, yerning meliorativ holatini to‘g‘ri baxolay olmaslik va unga chora ko‘rishdagi nochorlik, fermer xo‘jaliklarning aksariyatida agronomlar yetishmasligi, urug‘chilikning achinarli ahvoldaligi, sug‘orish ilmi unutilib borayotgani, suv taqsimotidagi xatoliklar va hokazo.
Qishloq xo‘jaligidagi qiyinchiliklarni bartaraf etish uchun avvalo yuqorida keltirilgan kamchiliklarni qanday yo‘qotish mumkin degan savolga javob topish kerak”, deydi Maqsuda Vorisova.
Izoh (0)