O‘zbekiston Respublikasi Prezidenti Shavkat Mirziyoyev 2-noyabr kuni xalq ta’limi tizimini yanada rivojlantirish borasidagi islohotlar samaradorligini oshirish masalalariga bag‘ishlangan yig‘ilish o‘tkazgan edi. Xalq ta’limi vaziri Sherzod Shermatov ushbu yig‘ilish yuzasidan o‘z fikr-mulohazalarini Facebook’dagi sahifasida ma’lum qildi.
— Prezident tomonidan oxirgi 4 oyda xalq ta’limiga e’tiborni kuchaytirish hamda o‘qituvchi mavqeyini oshirish bo‘yicha qator yig‘ilishlar o‘tkazilishi va qarorlar qabul qilinishi natijasida 13 mingga yaqin erkak o‘qituvchilar maktablarga qaytdi.
Viloyatlardagi uchrashuvlarda o‘qituvchilar ularga e’tibor avvalgi yillardagidan ko‘ra ancha o‘zgargani, jumladan, hozirgi vaqtda mavsumiy qishloq xo‘jalik ishlariga jalb etilmasdan o‘z maktablarida dars berishayotgani sababli, ular o‘z vaqtlarini ko‘proq farzandlar tarbiyasiga qarata olayotganliklaridan juda mamnunliklarini bildirishmoqda.
Albatta, bu maktab ta’limi sohasidagi islohotlarning endi boshlanishi. Bu islohotlar uzoq-uzoq tumanlarga yetib borishi uchun va eng asosiysi, ta’lim sifatiga katta ta’sir qilishi uchun anchagina mashaqqatli mehnat va vaqt talab etiladi.
Quvonarlisi, Prezident tashabbusidan keyin ko‘pchilik rahbarlar maktablarga yordam bera boshladilar. Lekin, shu bilan birgalikda, haligacha eskicha ishlashni qo‘msayotgan ba’zi rahbarlar uchrab turibdi. Hozirgi vaqtda o‘z yechimini topishi kerak bo‘lgan masala va muammolar ko‘p bo‘lishiga qaramay, davlat rahbari tomonidan qisqa muddatda yana bir bor xalq ta’limi masalalari bo‘yicha barcha mas’ullar bilan ochiqchasiga va bafurja muhokama qilishga shuncha vaqt ajratilishi ham, bu masalaning mamlakat kelajagi uchun juda muhimligidan dalolat va xalq ta’limi sohasiga panja ortidan qarayotgan ba’zi joylardagi shunday rahbarlarga o‘ziga xos signal hamdir.
Hozirgi shiddat bilan rivojlanayotgan zamonda faqat ta’limgina mamlakat kelajagi rivojini ta’minlay oladi. Aks holda, sun’iy intellekt, avtomatlashtirish kabi yo‘nalishlar o‘sib borayotgan to‘rtinchi industrial revolyutsiya davrida xalq ta’limi rivojlangan mamlakatlar bilan ta’limga e’tibor sust bo‘lgan mamlakatlar orasidagi tafovut juda keskinlashib boraveradi.
Shunday ekan, faqat bugungi kun bilan yashamasdan, aynan kelajakda mamlakat har tomonlama rivojlangan mamlakat bo‘lishiga o‘z hissamizni qo‘shishga harakat qilaylik. Imkon boricha maktablardagi sharoitlarni yaxshilashga va asosiysi, eng iste’dodli insonlarni aynan o‘qituvchilik kasbini tanlashga undaydigan muhit yaratishga barcha kuchni safarbar qilish vaqti keldi, — deb yozadi Xalq ta’limi vaziri.
Izoh (0)