Yagona umumrespublika protsessing markazi (YaUPM) POS-terminallarni boshqarish va monitoring qilish uchun texnik ishlanmalar ishlab chiqish va joriy etishga ixtisoslashgan ASHBURN International kompaniyasi o‘rtasida uzoq muddatli qo‘shma bitim imzolandi, deb yozadi O‘zA.
Kamida 10 yil amal qiladigan mazkur bitim doirasida ASHBURN International kompaniyasi mamlakatga ushbu kompaniya tomonidan mahalliy bozor uchun mo‘ljallangan TransLink.iQ. maxsus dasturiy ta’minotini taqdim etadi. Turli ishlab chiqaruvchilar POS-terminallarining bir-biriga mos kelishi, biznes xarajatlarni optimallashtirish, dasturiy ta’minotni yangilash, real vaqt rejimida monitoring qilish, POS-terminallar tarmog‘ini masofaviy boshqarish imkoniyatlarining mavjudligi yangi platformaning afzalliklaridan hisoblanadi. TransLink.iQ. platformasi kriptografik kalitlarni boshqarishni avtomatlashtirish, ekvayring tarmoqlarida yuz berishi mumkin bo‘lgan uzilishlarni qayd etish va ularga javob qaytarish imkonini beradi. Platforma xalqaro to‘lov tizimlari, yuqori darajali xavfsizlik standartlariga muvofiq ishlab chiqilgan va shu bois karta egalari shaxsiy ma’lumotlarining ishonchli himoyasini kafolatlaydi. Yagona umumrespublika protsessing markazi bir necha yil davomida har yili TransLink.iQ. platformasiga O‘zbekiston bo‘yicha 50 mingdan ortiq POS-terminallar ulashni rejalashtirmoqda.
Shuningdek, bitim doirasida yangi to‘lov terminallari va Yagona umumrespublika protsessing markazining O‘zbekistondagi 28 banklariga tegishli bo‘lgan POS-terminallar uchun 250 mingdan ortiq litsenziya sotish ko‘zda tutilgan.
Izoh (0)