Hukumat qarori bilan joriy yil maydan 2026-yil 1-yanvargacha O‘zbekistondagi mahalliy aviareyslar chiptalarining 25 foizi davlat byudjetidan qoplanadi. Xo‘sh, buning uchun qancha xarajat qilinadi? Transport vaziri o‘rinbosari Jasurbek Choriyev “Daryo”ga bergan intervyusida umumiy subsidiya miqdorini aytdi.
Jasurbek Choriyevning ma’lum qilishicha, aviakompaniyalarga respublika byudjetidan 60 milliard so‘m subsidiya ajratilgan.
“Samolyotlarni ham jamoat transporti deb atasa bo‘ladi. Zomin, Qo‘qon, Shahrisabz, Sariosiyo kabi ko‘plab mahalliy aeroportlarimiz ochildi. Ular yillar davomida ishlamay kelgan, umuman qo‘llab-quvvatlanmagan. Lekin ijtimoiy soha, turizmni rivojlantirish va investorlarga qulaylik yaratish maqsadida ular qayta ochildi. Ikkinchi tomondan samolyot eng qimmat transport hisoblanadi. Uning xarajatlari ham yuqori. Masalan, aviakerosin, texnik holatini nazorat qilish narxlari baland. Shu bilan birga, uchuvchilar yuqori maoshga ishlaydi. Agar tannarxi yoki minimal rentabellikdan kelib chiqib sotilsa, chiptalar qimmat bo‘lib ketadi. Aviakompaniya esa zararga ishlay olmaydi. Lekin davlat shu kabi ijtimoiy yo‘nalishlarga subsidiya berishga majbur”, dedi vazir o‘rinbosari.
2021-yilda O‘zbekistondagi aeroportlar davlat-xususiy sheriklik asosida rekonstruksiya qilinishi belgilangandi. Jasurbek Choriyevning aytishicha, Namangan va Buxoro aeroportlari shunday maqsadda xususiy kompaniyalarga topshiriladi. Urganch va Mo‘ynoq aeroportlari ham DXSH loyihasi doirasida rekonstruksiyaga beriladi. Kompaniyalar tender orqali tanlanadi.
Izoh (0)