Toshkentda 491 ta noqonuniy qurilgan turar joy obyektlariga mulk huquqi berildi

Toshkent shahar hokimligi hamda Davlat xizmatlari agentligi Toshkent shahar boshqarmasi hamkorligida ko‘chmas mulklarga nisbatan mulk huquqini e’tirof etish uchun kelib tushgan arizalarni ko‘rib chiqish va ijrosini ta’minlash borasida qator ishlar amalga oshirildi. Bu haqda “Daryo”ga Davlat xizmatlari agentligi Toshkent shahar boshqarmasi xabar berdi.

Toshkent shahri bo‘yicha jami 491 ta noqonuniy qurilgan yakka tartibdagi turar joy obyektlariga nisbatan mulk huquqi e’tirof etildi. Jumladan, Mirzo Ulug‘bek tumanida 139 ta, Shayxontohur tumanida 93 ta, Yunusobod tumanida 87 ta, Mirobod tumanida 43 ta, Yashnobod tuamnida 42 ta, Uchtepa tumanida 37 ta Sergeli tumanida 26 ta, Chilonzor tumanida 23 ta noqonuniy ravishda qurilgan yakka tartibdagi uy-joylarga nisbatan bir martalik umumdavlat aksiyasi doirasida tuman komissiyalarining qarori bilan egalik huquqi e’tirof etildi va fuqarolarni ko‘p yillar davomida qiynab kelgan muammolar hal etildi.

“Ko‘chmas mulkka nisbatan huquqni e’tirof etish ishlarini tashkil etish bo‘yicha Bektemir, Olmazor va Yakkasaroy tuman komissiyalari, ya’ni davlat xizmatini ko‘rsatishda qatnashuvchi vakolatli davlat organlari mutassadi xodimlari ham mazkur holatdan tegishli xulosa chiqaradilar va fuqarolarning arizalari ijrosini ta’minlash bo‘yicha qat’iy choralar ko‘radilar degan umiddamiz”,— deyiladi xabarda.