8-oktabr sanasida “Krasnodar” jamoasi yarim himoyachisi Pavel Mamayev hamda “Zenit” hujumchisi Aleksandr Kokorin Moskvadagi qahvaxonalardan birida katta janjal uyushtirgani haqida xabar berilgandi. Kecha, 11-oktabr sanasida ikkala futbolchiga ham dastlabki hukm o‘qildi.
Unga ko‘ra, Pavel Mamayev va Aleksandr Kokorin 2 oygacha, ya’ni 8-dekabrgacha hibsda bo‘ladi. Bunday qarorga Moskva shahrining Tver sudi kelgan. Garov evaziga ozodlikka chiqish yoki uy qamog‘iga olinishning umuman ilojisi yo‘q, deya ta’kidlanadi sud qarorida.
Ma’lumot uchun, ikkala futbolchining “sarguzashtlari” quyidagicha sodir bo‘lgandi:
7-oktabr, yakshanba kuni “Krasnodar” klubi “Zenit” maydoniga safar qildi. Uchrashuvda 2:1 hisobida “Zenit” g‘alaba qozondi. Mehmonlar tarkibida Pavel Mamayev to‘liq harakat qilib, jamoasining o‘yindagi yagona javob golini kiritishga erishdi. Aleksandr Kokorin esa zaxiradan maydonga tushirildi. O‘yindan so‘ng ikkala futbolchi do‘stligining 10 yilligini nishonlash uchun Moskvaga jo‘nab ketadi. Kechasi esa ular tungi klubga borib, tonggacha ko‘ngilxushlik qiladi.
8-oktabr, dushanba tongida futbolchilar tungi klubdan chiqib, avtoturargohdagi mashinalarni tepadi. Voqea joyida bo‘lgan Rossiyaning “Perviy kanal” boshlovchilaridan birining haydovchisi Vitaliy Solovchuk ulardan bunday qilmaslikni so‘raydi.B undan g‘azablangan futbolchilar haydovchini kaltaklaydi. Oradan Ikki soat o‘tib Mamayev hamda Kokorin do‘stlari bilan nonushta qilish uchun shahardagi qahvaxonalardan biriga yo‘l oladi. Ular qahvaxonada shovqin ko‘tarishadi. Ulardan Savdo-sanoat vazirligi amaldori bo‘lgan Denis Pak shovqinni bas qilishni so‘raydi. G‘azab otiga mingan “sportchilar” esa uni ham kaltaklab ketadi. Hattoki amaldorga stul ham uloqtiriladi.
Shu tariqa Moskva politsiyasi bu borada jinoiy ish ochadi.
Izoh (0)