O‘zbekiston-Tojikiston chegarasida Panjikent va Samarqand shaharlari yo‘nalishida minalardan tozalash ishlari olib borilmoqda, deb yozadi Asia-Plus. Chegarani minasizlantirishda o‘zbekistonlik sapyorlarga tojikistonlik mutaxassislar yordam bermoqda.
Tojikiston Milliy xavfsizlik davlat qo‘mitasi vakilining so‘zlariga ko‘ra, chegarani minalardan tozalashni boshlashdan avval ikki mamlakat hukumatlarining qo‘shma guruhi Toshkent tomonidan taqdim etilgan, chegaraning minalangan hududlari xaritasi bilan tanishgan.
Biroq O‘zbekiston-Tojikiston chegarasining aynan qaysi hududlari minalangani va ularning umumiy maydoni qanchaligi haqidagi ma’lumot maxfiy qoldirilmoqda.
Ta’kidlanishicha, O‘zbekiston Prezidenti Shavkat Mirziyoyevning Tojikistonga mart oyidagi birinchi davlat tashrifi chog‘ida ikki mamlakat rahbarlari 2019-yil oxirigacha umumiy chegarani minalardan tozalash ishlarini yakunlashga kelishib olgan edi.
Tojikiston Milliy mina markazi ma’lumotlariga ko‘ra, o‘tgan 20 yil ichida 374 nafar tojikistonlik minalar portlashidan halok bo‘lgan, yana 485 nafari jabrlangan. Minasizlantirish chog‘ida esa 20 nafar tojikistonlik sapyor jarohat olgan, ikki nafari esa halok bo‘lgan.
Izoh (0)