Ijtimoiy tarmoqlarda yosh yigit “Gazel” avtomobilining oynalarini metall buyum bilan urib sindirayotgani aks etgan video tarqalib ketdi, deb xabar beradi Toshkent shahar IIBB.
Ma’lum bo‘lishicha, 2018-yil 12-sentabr kuni soat taxminan 10:30 da Chilonzor tumanining Bunyodkor ko‘chasida “Gazel” va Matiz avtomobillari haydovchilari — 60 yoshli Baxtiyor T. va 27 yoshli Shohrux E. o‘rtasida mushtlashuv yuzaga kelgan. Janjalga haydovchilarning bir-biriga yo‘l berishni istamaganligi sabab bo‘ldi. Oqibatda haydovchilar bir-biriga tan jarohatlarini yetkazdi va ikkalasi ham tibbiy yordamga murojaat qildi.
Yaqin orada bo‘lgan ichki ishlar organlari xodimi ularni janjalni bas qilish va kelishmovchilikni qonun doirasida hal qilishga da’vat etdi. Ammo Matiz haydovchisi huquq-tartibot posbonlarining qonuniy talablariga rioya qilishdan bosh tortdi. Ustiga-ustak, “Gazel” haydovchisiga hujum qilishda davom etib, uning mashinasi oynalarini metall buyum bilan sindira boshladi.
Chilonzor tumani Ichki ishlar organlari faoliyatini muvofiqlashtirish boshqarmasi tergov bo‘limi tomonidan ushbu holat bo‘yicha Shohrux E. ga nisbatan Jinoyat kodeksining 277-moddasi (Bezorilik) jinoyat ishi qo‘zg‘atildi.
Izoh (0)