Qashqadaryo viloyatida voyaga yetmaganlar o‘rtasida huquqbuzarliklarning oldini olish, profilaktik hisobda turuvchi yoshlarni to‘g‘ri yo‘lga solish, ularni sport va kasb-hunarga jalb etish borasida salmoqli ishlar amalga oshirilmoqda, deb yozadi O‘zA.
Xususan, O‘zbekiston yoshlar ittifoqi Qashqadaryo viloyat kengashi tomonidan ichki ishlar bo‘limlarida profilaktik hisobda turgan voyaga yetmaganlar, ularning ota-onalari va yaqinlari ishtirokida muntazam profilaktik uchrashuvlar o‘tkazib kelinmoqda.
Joriy yil 15—24-avgust kunlari “Sho‘rtanneftgaz” mas’uliyati cheklangan jamiyati tasarrufidagi Yakkabog‘ tumanida joylashgan “Sho‘rtan qaldirg‘ochi” oromgohida ichki ishlar idoralarida profilaktik hisobda turuvchi voyaga yetmaganlar uchun tarbiya va sport-sog‘lomlashtirish oromgohi tashkil etildi.
Oromgohda bolalarning mazmunli dam olishi uchun madaniy, ma’naviy-ma’rifiy, sport-sog‘lomlashtirish hamda huquqiy madaniyatni oshirishga qaratilgan tadbirlar, amaliy mashg‘ulotlar, o‘quv seminarlari, davra suhbatlari va uchrashuvlar o‘tkazildi.
Ichki ishlar idoralarida profilaktik hisobda turuvchi 122 nafar voyaga yetmagan bola turli tadbir, tanlov va loyihalarda faol qatnashdi. Jinoyatchilik ko‘chasiga adashib kirib qolganini anglab yetgan bolalarning 70 nafariga O‘zbekiston yoshlar ittifoqi Qashqadaryo viloyat kengashi tomonidan ijobiy tavsiyanomalar berilib, muddatidan oldin hisobdan chiqariladigan bo‘ldi.
Izoh (0)