Yevroparlamentning Avstriyadan a’zosi, “Yashillar — Yevropa erkin alyansi” fraksiyasidan deputat Mishel Reymon Avstriya tashqi ishlar vaziri Karin Knaysldan Rossiya prezidenti Vladimir Putinni o‘z to‘yiga chaqirgani uchun iste’foga chiqishni talab qildi. Bu haqda siyosatchi o‘z Twitter’ida yozdi, deb xabar qiladi “Gazeta.ru”.
Reymonning fikricha, Rossiya prezidentining Avstriya oliy mansabli amaldorining to‘yiga taklif etilishi mamlakat imijiga tashqi siyosiy zarar yetkazishi mumkin.
“Moviy-zangori (koalitsiya) hukumati Yevroittifoqda Rossiya rejimining uzatilgan qo‘li kabi qabul qilinadi va mamlakatimiz obro‘siga yaxshi ta’sir ko‘rsatmaydi. Bu nafaqat Avstriya, balki Yevropaga taalluqli bo‘lgan muammo. Tashqi ishlar vaziri Knaysl buning uchun javobgar va Avstriyaga zarar yetishining oldini olish uchun zudlik bilan iste’foga chiqishi kerak. Agar u buni ixtiyoriy ravishda qilmasa, federal kansler bugun uni ishdan bo‘shatish taklifi bilan prezidentga chiqishi kerak”, — deb yozdi Reymon 16-avgust kuni.
Uning so‘zlariga ko‘ra, Avstriya TIV rahbarining to‘yi — birinchi navbatda, shaxsiy tantana, shu sababli bu voqea Avstriyaning tashqi siyosatdagi o‘rniga ta’sir qilmasligi kerak.
Avvalroq Rossiya prezidenti Vladimir Putin haqiqatan ham Avstriya tashqi ishlar vaziri Karin Knayslning to‘yida qatnashishi haqida uning matbuot kotibi Dmitriy Peskov ma’lum qilgan edi.
Izoh (0)