Тошкент шаҳрида кесиладиган дарахтларга белгилар қўйиб чиқиш таклиф этилди

Тошкент шаҳар ҳокимлигида Жамоатчилик кенгашининг илк матбуот брифинги бўлиб ўтди. Бу ҳақда ҳокимлик матбуот хизмати хабар берди.

Тадбирда Жамоатчилик кенгаши вакиллари томонидан икки ойлик иш фаолияти натижалари тўғрисида хулосалар чиқарилди, йўналишлар бўйича иш-режалари тақдим этилди ҳамда ОАВ вакиллари ва шаҳар аҳолисининг саволларига атрофлича жавоб берилди.

Матбуот брифингида Жамоатчилик кенгаши вакилларининг қисқа баёнотлари эшитилди. Бунда кенгаш томонидан бажарилган ишлар, хусусан, лойиҳаларнинг амалий чоралари ҳақида сўз юритилди.

Жамоатчилик кенгаши раиси Ҳикмат Абдурахманов, раис ўринбосари Диёр Мирзаахмедов ҳамда Атроф-муҳитни муҳофаза қилиш қўмитаси раҳбари Алексей Волков сўзга чиқди ва тадбир иштирокчиларига батафсил маълумот берди.

Жамоатчилик кенгаши вакиллари томонидан оралиқ натижалар эшиттирилди, муҳим йўналишлар бўйича амалга ошириладиган келгуси режалар тақдим этилди. Кенгашнинг профил қўмиталари тузилиб, ушбу қўмиталар раҳбарлари сайланди, ягона иш фаолияти стратегияси ишлаб чиқилди.

• Шаҳарни узоқ муддатли стратегик ривожлантириш;
• Ҳокимликнинг очиқлиги ва фаоллигини кучайтиришда ҳамкорлик қилиш, давлат буюртмалари, давлат идоралари мулклари, бизнес-лойиҳаларнинг шаффофлигини таъминлаш;
• Тошкент шаҳрининг яшиллигини сақлаб қолиш;
• Шаҳарнинг оммабоп муҳитини ва инклюзив жамоатчиликни яратиш;
• Шаҳарда тадбиркорликни ривожлантириш ва хизмат соҳаси улушини орттириш.

Атроф-муҳитни муҳофаза қилиш қўмитаси раҳбари Алексей Волков бугунги кунда долзарб бўлиб қолган муаммолардан бири — дарахтларнинг ноқонуний кесилиши борасида изоҳ берди:

—Жамоатчилик кенгаши шаҳар ҳокимлигига ёзма равишда мурожаат қилиб, дарахтларни ноқонуний кесишга қарши курашиш борасида 12 та таклифни билдирди. Бизнинг фикримизча, булардан энг муҳимлари қуйидагилар:

• Касал ва қуриган дарахтларни кесиш билан боғлиқ рухсатномалар ҳокимлик сайтида жойлаштирилади;
• Бундай дарахтлар фақатгина шаҳар ободонлаштириш хизмати томонидан кесиб ташланади. Кесиб ташланиши мўлжалланган дарахтларга олдиндан белгилар қўйиб чиқилади;
• Барча дарахтлар расмий равишда ер участкалари кадастрига киритилади, қурилишга рухсат бериш ҳудуддаги дарахтлар сонига боғлиқ бўлади. Қурувчи ташкилот битта кесиб ташланган дарахт ўрнига 10 та дарахтнинг экилишини таъминлашга мажбур.