O‘zbekiston Oliy Majlisi Senati Qonunchilik va sud-huquq masalalari qo‘mitasi jamoatchilikni o‘z faoliyatidan xabardor qilmoqda, deb xabar beradi O‘zbekiston Respublikasi Oliy Majlisi Senati axborot xizmati xabar bermoqda.
Ta’kidlanganidek, 2018-yil mart va iyun oylarida Senatning ikkita yalpi majlisi o‘tkazildi. Ularga tayyorgarlik jarayonida Qo‘mita tomonidan qator masalalar o‘rganildi, ishlab chiqildi va Senat ko‘rib chiqishi uchun taqdim etildi. Xususan, O‘zbekiston Respublikasi Oliy Majlisi Inson huquqlari bo‘yicha vakilining (ombudsmanning) 2017-yildagi faoliyati to‘g‘risidagi hisoboti, O‘zbekiston Respublikasi adliya vazirining huquqiy targ‘ibot va ma’rifatning holati haqidagi axboroti eshitildi.
Qo‘mita tomonidan “Jamoatchilik nazorati to‘g‘risida”gi O‘zbekiston Respublikasi Qonuni, “Sud-tergov faoliyatida fuqarolarning huquq va erkinliklari kafolatlarini kuchaytirish bo‘yicha chora-tadbirlar qabul qilinganligi munosabati bilan O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi O‘zbekiston Respublikasi Qonuni mart oyida o‘tkazilgan yalpi majlis muhokamasiga kiritildi.
Oliy Majlis Senatining o‘n beshinchi yalpi majlisini o‘tkazish doirasida Qo‘mita tomonidan O‘zbekiston Respublikasi Bosh prokurorining O‘zbekiston Respublikasi prokuratura organlarining 2017-yildagi faoliyati to‘g‘risidagi hisoboti dastlabki tarzda eshitildi. “Mediatsiya to‘g‘risida”gi O‘zbekiston Respublikasi Qonuni, “O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi O‘zbekiston Respublikasi Qonuni ko‘rib chiqish uchun tayyorlandi.
Shu bilan birga, Qo‘mita tomonidan xalq bilan muloqotni qo‘llab-quvvatlashga, saylovchilar bilan ishlashga alohida e’tibor qaratildi. Jumladan, o‘tgan davr mobaynida saylovchilar bilan 384 ta uchrashuv o‘tkazildi, 638 nafar fuqaro qabul qilindi va fuqarolarning 5342 ta yozma murojaati ko‘rib chiqildi. Murojaatlarning ko‘pchiligi nazoratga olindi, bu esa ko‘tarilgan masalalarning samarali hal etilishini ta’minladi.
Masalan, fuqaro Turdiqul Usmonqulov Qo‘mitaga murojaat qilib, qizi G.Usmonqulovaga nisbatan chiqarilgan sud qarorlaridan noroziligini bildirdi va qizi qasddan odam o‘ldirish jinoyatini sodir etmaganini, balki o‘z nomusini va qadr-qimmatini saqlash uchun o‘zini himoya qilishga majbur bo‘lganini ta’kidladi. Shu munosabat bilan Qo‘mita O‘zbekiston Respublikasi Oliy sudiga ushbu jismoniy shaxsning murojaatida keltirilgan har bir dalilni o‘rganib chiqish va murojaat muallifiga yozma javob berish hamda Senatning Qonunchilik va sud-huquq masalalari qo‘mitasiga batafsil axborot taqdim etish iltimosi bilan murojaat qildi.
O‘zbekiston Respublikasi Oliy sudi tomonidan Senatga javob xati yuborildi. Unga ko‘ra, Oliy sud raisi o‘rinbosarining protesti asosida G.Usmonqulovaga nisbatan jinoyat ishi Oliy sudning jinoyat ishlari bo‘yicha sudlov hay’ati tomonidan ko‘rib chiqildi, sud qarorlari bekor qilindi, G.Usmonqulovaga tayinlangan 10 yil ozodlikdan mahrum qilish jazosining muddati o‘zgartirilib, 6 yilgacha qisqartirildi.
Izoh (0)