Olmazor tumanidagi ixcham to‘yga 100 nafar mehmon keldi

Eng yaqin qarindoshlar, kichik jamoa, kelin-kuyovning oila a’zolari ishtirokida Toshkent shahri, Olmazor tumanidagi “Tarona” to‘yxonasida o‘tgan Ubaydullabek va Munojotxonlarning visol oqshomiga 100 nafar mehmon keldi. Bu haqda O‘zA xabar berdi.

Mavluda G‘aniyeva, kuyovning onasi:

— Qarindosh-urug‘, qudalarim bilan kelishgan holda ixcham to‘y qilyapman. Kamxarj to‘y qilib, ortgan pullarimizni uyning kam-ko‘stiga ishlatdik. Mebellarni ham o‘zim oldim, charlari, salomlar, qo‘niqlar, hayitlar, tog‘oralar kabi “udumlar”ni qilmaslikka kelishdik. Farzandlarim ham bunga rozi bo‘ldi. Prezident ham Olmazor tumaniga kelganida to‘y haqida gapirdi, men ham bundan so‘ng kamchiqim to‘y qilishga qaror qildim.

Samig‘jon Hikmatov, Olmazor tuman fuqarolar o‘zini-o‘zi boshqarish organlari faoliyatini muvofiqlashtirish kengashlari raisining diniy-ma’rifiy masalalar bo‘yicha o‘rinbosari:

— Yurtboshining Olmazor tumaniga tashrifi, xalq bilan muloqoti davomida mahalla oqsoqollari bilan uchrashganlarida bugungi kunda eng dolzarb masalalardan biri to‘y-hashamlarni ixcham o‘tkazish va yosh oilalarning kelgusida baxtli yashashlari uchun kerakli ishlarni qilish bo‘yicha o‘z fikr-munosabatlarini bildirdi. Mazkur tashrifdan so‘ng tumanimizdagi 58 ta mahalla raisi bilan bamaslahat bir fikrga keldikki, Olmazor tumani kelgusida o‘tkaziladigan to‘ylarda o‘zining alohida o‘rniga ega bo‘lishi kerak va kamxarj, chiroyli, ixcham to‘ylarni o‘tkazishni boshlashi kerak.

Sharofiddin Imomov, mahalla faoli:

— Jamoatchilik asosida, kelishilgan holda shu to‘y marosimi o‘tkazishni boshlab berdik. Mahallamizda to‘y qiladiganlarda ikkilanish holatlari ham bor. Bugungi to‘y tafsilotini ularga tushuntiradigan bo‘lsak, qiziqish ortib, xudo xohlasa, hamma mahallada shunaqa ixchamgina, kelishilgan holda, chiroyli to‘ylar o‘tadi, degan umiddaman. Ilgari to‘ydan so‘ng ham charlari, kelin salomlar bo‘lardi, ular ham bir to‘yday o‘tardi. Hozir ularni yo‘q qildik. Uning o‘rniga kelin-kuyovga biror narsa olib berish mumkin bo‘ladi, turmush darajasi ancha yaxshilanadi. To‘y bir zumda o‘tadi-ketadi, lekin bu narsalar bir umrga qoladi. Bugungi to‘yimiz chiroyli o‘tdi, bundan namuna olib, butun yurtimizdagi boshqa mahallalarda ham xuddi shunaqa to‘ylar o‘tkazilsa maqsadga muvofiq bo‘lardi.

Bo‘lg‘usi yosh oila uchun Olmazor tuman hokimligi va tuman “Mahalla” xayriya jamoat fondi tomonidan Prezident sovg‘asi topshirildi.