Xalq deputatlari Samarqand viloyat Kengashining 54-sessiyasida viloyat hokimi tomonidan har payshanba kuni televideniyedan tarmoq rahbarlari chiqishi belgilab olindi. Televideniyeda chiqishda tarmoq rahbarlarining faqat birinchi rahbarlari chiqadi. Agar ular chiqmasa televideniyeda chiqmaydigan sababini xalqqa ochiq aytilishini bildirib o‘tdi, deya xabar bermoqda “Daryo” muxbiri Farhod Norbo‘tayev.
— Har yakshanba kuni hokimlar chiqish qiladi. Ertaga yakshanba kuni (22-iyul) shahar hokimi chiqish qiladi. Hamma tuman va shahar hokimliklari chiqish qilib bo‘lganidan so‘ng viloyat hokimi ham jonli efirda chiqish qiladi, deya bildirib o‘tdi E. Turdimov.
Viloyat hokimining bildirishicha hamma chiqishlar jonli efirda amalga oshiriladi.
— Viloyat hokimining telegramda maxsus kanali ochildi. Dushanba, 23-iyul kunidan rasman ish boshlaydi (+99897-405-40-06). Bu raqamni har bitta tashkilotga berib qo‘yamiz. Shaxsan o‘zim har qanday sharoitda bo‘lsa ham murojaatlarni o‘qib boraman, deya ta’kidladi viloyat hokimi.
Viloyat hokimligi tomonidan guruh tuzilib, guruh ushbu murojaatlarni o‘rganish jarayonini nazorat qiladi. Butun samarqandliklar shu raqamni bilishi lozimligini bildirib o‘tdi. Kim yoki qaysi tashkilot noqonuniy harakat qilyaptimi hokimga ma’lum qilsin. Yashirmasin. Hokimiyatning xodimimi yoki boshqa struktura xodimlarimi har bittasini bilishimiz kerak. Biz iloji boricha har bir masalani tagiga yetib borishga harakat qilamiz. Buning uchun 24 soat ishlashga tayyormiz. Har bitta tuman va shahar rahbarlarining Telegram’da murojaat qabul qiladigan raqami bo‘lishi kerak. Kerak bo‘lsa yuborilayotgan murojaatlarni joyiga qarab tuman rahbarlariga o‘zimiz yuboramiz,—deydi E.Turdimov.
Sessiyada viloyat hokimining tashabbusi bilan hamma rahbarlar ijtimoiy tarmoqlarda sahifa ochish lozimligi bildirildi. Qilayotgan har bir ishini yoritib, har bir rahbar ijtimoiy tarmoqlar orqali hisobot berish kerakligi ta’kidlab o‘tildi. Ko‘p idoralar o‘zining qilgan ishini bildirmasligi sababli odamlarda hech qanday ma’lumot yo‘qligi, natijada ular ko‘chadagi noto‘g‘ri ma’lumotga ishonib, uni yuz foiz to‘g‘ri qabul qilishini bildirib o‘tildi.
Viloyat hokimligida kecha-yu kunduz ishlaydigan ishonch raqami ham tashkil qilinadi. Ishonch raqamiga Samarqandning istalgan hududidan murojaat qilish imkoniyati yaratiladi. Murojaatlar 24 soat davomida qabul qilinadi. Qabulda o‘tirganlar murojaatning elektron variantini ham yozma variantini ham ijrochiga yetkazib berishi ta’kidlandi.
— Jamoatchilik guruhlarini tuzib, butun jamoatchilik guruhlarini dushanba kunidan (23-iyul) Paxtachi tumaniga yuboramiz. Ular tumanda har bir xonadonni ko‘radi. Hamma rahbar tumanda yuradi. Uyma uy yurib haqiqiy ahvolni o‘rganadi,— deb ta’kidlab o‘tdi hokim.
— Hozir sen menga tegmasang bo‘ldi, men senga tegmayman qabilida ish tutayapmiz. Odamlar boqimanda bo‘lib boryapti. To‘g‘risini yozgan odamni biz qo‘llab-quvvatlaymiz. Noto‘g‘ri yozganni, birov uchun yozib bergan odamni aniqlab butun elga bildiramiz. Mana bu odam hammaga yozib yurarkan, yuz marta yozarkan deb.
Viloyat hokimi sayyor qabullarni ham ko‘paytirish lozimligini bildirib o‘tdi. Joylarga borib xalq bilan sayyor qabullarni qilish, har bir rahbar kabinetda emas, balki qishloqlarda faoliyat yuritish lozimligini bildirdi.
Sessiya yakunida viloyat hokimi vazifasini bajaruvchi E.Turdimov deputatlardan faol bo‘lib, ijro hokimiyati bilan birgalikda oddiy fuqarolarni dardini olib chiqib qo‘ldan kelgancha ularga amaliy yordam beradigan bo‘lsak xalq sizdan ham bizdan ham minnatdor bo‘lishini bildirib o‘tdi.
Izoh (0)