Халқ депутатлари Самарқанд вилоят Кенгашининг 54-сессиясида вилоят ҳокими томонидан ҳар пайшанба куни телевидениедан тармоқ раҳбарлари чиқиши белгилаб олинди. Телевидениеда чиқишда тармоқ раҳбарларининг фақат биринчи раҳбарлари чиқади. Агар улар чиқмаса телевидениеда чиқмайдиган сабабини халққа очиқ айтилишини билдириб ўтди, дея хабар бермоқда «Дарё» мухбири Фарҳод Норбўтаев.
— Ҳар якшанба куни ҳокимлар чиқиш қилади. Эртага якшанба куни (22 июль) шаҳар ҳокими чиқиш қилади. Ҳамма туман ва шаҳар ҳокимликлари чиқиш қилиб бўлганидан сўнг вилоят ҳокими ҳам жонли эфирда чиқиш қилади, дея билдириб ўтди Э. Турдимов.
Вилоят ҳокимининг билдиришича ҳамма чиқишлар жонли эфирда амалга оширилади.
— Вилоят ҳокимининг телеграмда махсус канали очилди. Душанба, 23 июль кунидан расман иш бошлайди (+99897-405-40-06). Бу рақамни ҳар битта ташкилотга бериб қўямиз. Шахсан ўзим ҳар қандай шароитда бўлса ҳам мурожаатларни ўқиб бораман,— дея таъкидлади вилоят ҳокими.
Вилоят ҳокимлиги томонидан гуруҳ тузилиб, гуруҳ ушбу мурожаатларни ўрганиш жараёнини назорат қилади. Бутун самарқандликлар шу рақамни билиши лозимлигини билдириб ўтди. Ким ёки қайси ташкилот ноқонуний ҳаракат қиляптими ҳокимга маълум қилсин. Яширмасин. Ҳокимиятнинг ходимими ёки бошқа структура ходимларими ҳар биттасини билишимиз керак. Биз иложи борича ҳар бир масалани тагига етиб боришга ҳаракат қиламиз. Бунинг учун 24 соат ишлашга тайёрмиз. Ҳар битта туман ва шаҳар раҳбарларининг Telegram’да мурожаат қабул қиладиган рақами бўлиши керак. Керак бўлса юборилаётган мурожаатларни жойига қараб туман раҳбарларига ўзимиз юборамиз,—дейди Э.Турдимов.
Сессияда вилоят ҳокимининг ташаббуси билан ҳамма раҳбарлар ижтимоий тармоқларда саҳифа очиш лозимлиги билдирилди. Қилаётган ҳар бир ишини ёритиб, ҳар бир раҳбар ижтимоий тармоқлар орқали ҳисобот бериш кераклиги таъкидлаб ўтилди. Кўп идоралар ўзининг қилган ишини билдирмаслиги сабабли одамларда ҳеч қандай маълумот йўқлиги, натижада улар кўчадаги нотўғри маълумотга ишониб, уни юз фоиз тўғри қабул қилишини билдириб ўтилди.
Вилоят ҳокимлигида кеча-ю кундуз ишлайдиган ишонч рақами ҳам ташкил қилинади. Ишонч рақамига Самарқанднинг исталган ҳудудидан мурожаат қилиш имконияти яратилади. Мурожаатлар 24 соат давомида қабул қилинади. Қабулда ўтирганлар мурожаатнинг электрон вариантини ҳам ёзма вариантини ҳам ижрочига етказиб бериши таъкидланди.
— Жамоатчилик гуруҳларини тузиб, бутун жамоатчилик гуруҳларини душанба кунидан (23 июль) Пахтачи туманига юборамиз. Улар туманда ҳар бир хонадонни кўради. Ҳамма раҳбар туманда юради. Уйма уй юриб ҳақиқий аҳволни ўрганади,— деб таъкидлаб ўтди ҳоким.
— Ҳозир сен менга тегмасанг бўлди, мен сенга тегмайман қабилида иш тутаяпмиз. Одамлар боқиманда бўлиб боряпти. Тўғрисини ёзган одамни биз қўллаб-қувватлаймиз. Нотўғри ёзганни, биров учун ёзиб берган одамни аниқлаб бутун элга билдирамиз. Мана бу одам ҳаммага ёзиб юраркан, юз марта ёзаркан деб.
Вилоят ҳокими сайёр қабулларни ҳам кўпайтириш лозимлигини билдириб ўтди. Жойларга бориб халқ билан сайёр қабулларни қилиш, ҳар бир раҳбар кабинетда эмас, балки қишлоқларда фаолият юритиш лозимлигини билдирди.
Сессия якунида вилоят ҳокими вазифасини бажарувчи Э.Турдимов депутатлардан фаол бўлиб, ижро ҳокимияти билан биргаликда оддий фуқароларни дардини олиб чиқиб қўлдан келганча уларга амалий ёрдам берадиган бўлсак халқ сиздан ҳам биздан ҳам миннатдор бўлишини билдириб ўтди.
Изоҳ (0)