O‘zbekistonda vino ishlab chiqarish jarayoni 1975-1985-yillarda yuqori bosqichga chiqqan edi. Shu davrlarda respublikada ishlab chiqarilgan desert vinolar — “Vassarg‘a”, “Guliqandoz”, “Shirin” milliy brend sifatida eksport qilingan, deya xabar beradi O‘zA.
Hozirda ham vino ishlab chiqarish korxonlari o‘z brendlari bilan dunyoning ko‘pgina davlatlarida o‘tkazilgan festivallarda faol ishtirok etib kelmoqda. “Sijjak”, “O‘zbekiston”, “Bog‘izag‘on” va boshqa nomdagi mahsulotlar shular sirasidandir.
Yaqinda ba’zi manbalarda O‘zbekistonda yetishtirilgan anor sharbatidan Fransiyada likyor ishlab chiqarilayotgani haqida mish-mishlar tarqaldi. “O‘zsharobsanoat”ning mutaxassislari qo‘llarida aniq, ishonchli ma’lumotlari yo‘qligini aytib, Sirdaryo viloyati, Mirzaobod tumanidagi “Mirzaobod anor uzumzorlari” agrofirmasiga yo‘naltirdi.
Agrofirma rahbari Jamshid Sultonovning ma’lum qilishicha, ayni vaqtda tumanda 1,1 ming gektar anorzor tashkil qilingan. “Qora qayin”, “Qizil po‘choq” kabi navlar ekilgan anorzorlar yaqin yillarda 4 ming gektarga yetkaziladi. 2021-yilda to‘liq hosilga kiradigan bu daraxtlardan olingan hosilning asosiy qismi qayta ishlanar ekan.
— Eng muhimi, sohaga klaster tizimi tatbiq etiladi, – deydi J.Sultonov. — Xorijdan keltirilgan qayta ishlash uskunalari ko‘magidan hosildan yuqori sifatli anor sharbati va likyor tayyorlashni mo‘ljallab turibmiz. Likyorni xaridori tayyor, uni Angliya va Fransiyaga eksport qilamiz.
O‘zbek anorining sharbatidan fransuzlar tayyorlayotgan ichimlik haqidagi savolga qisqacha javob olindi:
“Bilishimcha, Fransiyada tayyorlanib, Angliyaga har bir shishasi 20 dollardan sotilayotgan likyorning nomi Fair ekan. Uni tarkibida aynan O‘zbekistonda yetishtirilgan anor sharbati bor deyilmoqda. Biz ham yaqin yillarda anor va uning sharbatini, likyorni ‘O‘zbekistonda ishlab chiqarilgan’ yorlig‘i bilan eksport qilishni boshlaymiz”.
Izoh (0)