Ўзбекистонда вино ишлаб чиқариш жараёни 1975-1985 йилларда юқори босқичга чиққан эди. Шу даврларда республикада ишлаб чиқарилган десерт винолар — «Вассарға», «Гулиқандоз», «Ширин» миллий бренд сифатида экспорт қилинган, дея хабар беради ЎзА.
Ҳозирда ҳам вино ишлаб чиқариш корхонлари ўз брендлари билан дунёнинг кўпгина давлатларида ўтказилган фестивалларда фаол иштирок этиб келмоқда. «Сижжак», «Ўзбекистон», «Боғизағон» ва бошқа номдаги маҳсулотлар шулар сирасидандир.
Яқинда баъзи манбаларда Ўзбекистонда етиштирилган анор шарбатидан Францияда ликёр ишлаб чиқарилаётгани ҳақида миш-мишлар тарқалди. «Ўзшаробсаноат»нинг мутахассислари қўлларида аниқ, ишончли маълумотлари йўқлигини айтиб, Сирдарё вилояти, Мирзаобод туманидаги «Мирзаобод анор узумзорлари» агрофирмасига йўналтирди.
Агрофирма раҳбари Жамшид Султоновнинг маълум қилишича, айни вақтда туманда 1,1 минг гектар анорзор ташкил қилинган. «Қора қайин», «Қизил пўчоқ» каби навлар экилган анорзорлар яқин йилларда 4 минг гектарга етказилади. 2021 йилда тўлиқ ҳосилга кирадиган бу дарахтлардан олинган ҳосилнинг асосий қисми қайта ишланар экан.
— Энг муҳими, соҳага кластер тизими татбиқ этилади, – дейди Ж.Султонов. — Хориждан келтирилган қайта ишлаш ускуналари кўмагидан ҳосилдан юқори сифатли анор шарбати ва ликёр тайёрлашни мўлжаллаб турибмиз. Ликёрни харидори тайёр, уни Англия ва Францияга экспорт қиламиз.
Ўзбек анорининг шарбатидан французлар тайёрлаётган ичимлик ҳақидаги саволга қисқача жавоб олинди:
«Билишимча, Францияда тайёрланиб, Англияга ҳар бир шишаси 20 доллардан сотилаётган ликёрнинг номи Fair экан. Уни таркибида айнан Ўзбекистонда етиштирилган анор шарбати бор дейилмоқда. Биз ҳам яқин йилларда анор ва унинг шарбатини, ликёрни ‘Ўзбекистонда ишлаб чиқарилган’ ёрлиғи билан экспорт қилишни бошлаймиз».
Изоҳ (0)