3—4-iyul kunlari Ichki ishlar vazirining maslahatchisi general-polkovnik Zokirjon Almatov rahbarligidagi ishchi guruhi Farg‘ona viloyatiga tashrif buyurdi. Bu haqda “Daryo” muxbiri Azizjon Ermatov xabar berdi.
Dastlab Qo‘qon shahrida yangi faoliyat boshlagan sport majmuasini ko‘zdan kechirgan ishchi guruhi a’zolari bu yerda yoshlarga sport bilan shug‘ullanish uchun yaratilgan sharoitlarga yuqori baho berdi.
Shundan so‘ng ishchi guruhi a’zolari Farg‘ona tumani Chimyon qishlog‘ida joylashgan “Hazrati Huvaydo” ziyoratgohida bo‘lib, tarixiy qadamjoda qishloq nuroniylari va faxriylar bilan suhbatlashdi.
Farg‘ona viloyat IIB patrul post xizmati va jamoat tartibini saqlash boshqarmasiga qarashli batalyon hamda alohida vazifalarni bajaruvchi safarbar otryad xodimlari bilan uchrashuv o‘tkazildi.
Farg‘ona shahrida ichki ishlar organlari faxriylari, shahar va tuman ichki ishlar bo‘limlari boshliqlarining yoshlar masalalari bo‘yicha o‘rinbosarlari, imom-xatiblar, xotin-qizlar qo‘mitalari hamda O‘zbekiston yoshlar ittifoqi viloyat Kengashi faollari ishtirokida yig‘ilish o‘tkazildi. Tadbirda Farg‘ona viloyati hokimi, Oliy Majlis Senati a’zosi Shuhrat G‘aniyev qatnashdi.
Unda Ichki ishlar vaziri maslahatchisi, general-polkovnik Z. Almatov jinoyatchilik va huquqbuzarliklarning oldini barvaqt olish, yoshlar tarbiyasi, ularni salbiy illatlar ta’siridan saqlash, ayollar o‘rtasidagi jinoyatlarning oldini olish, oilalardagi totuvlikni mustahkamlash yuzasidan fikr-mulohazalarini bildirdi.
2018-yilning o‘tgan davrida xizmat olib borayotgan mahallasida umuman jinoyat qayd etilmagan eng fidoyi profilaktika inspektorlaridan bir guruhiga viloyat hokimligining qimmatbaho esdalik sovg‘alari topshirildi.
Tashrifning ikkinchi kuni IIV ishchi guruhi viloyat ichki ishlar boshqarmasida tashkil etilgan xotira xiyoboni, ichki ishlar organlari tarixiga oid muzey hamda kutubxona faoliyati bilan tanishdi. Shahardagi “Hamza” teatrida ishchi guruhi a’zolari ishtirokida yakuniy yig‘ilish o‘tkazildi.
Izoh (0)