Turkiya prezidenti Rajab Toyyib Erdo‘g‘on o‘zi va Rossiya prezidenti Vladimir Putinni BMT Bosh Assambleyasidagi eng tajribali siyosatchilar ekani va ularning o‘xshash tomonlari ko‘pligini aytdi. Bu haqda “RIA Novosti” xabar berdi.
“Tajriba haqida gapiradigan bo‘lsam: BMT Bosh Assambleyasida 2 nafar eng tajribali siyosatchi bor – boshqalarni eslolmayapman, balki yana kimlardir bordir – biri men, ikkinchisi – Putin. Agar prezidentlik va bosh vazir lavozimida ishlash davrini hisoblaydigan bo‘lsak, umumiy hisobda 15—16 yillik muddat bo‘ladi. Bu davrda erishilgan natijalar bor, hali qilinishi kerak bo‘lgan ishlar ham”, — deya Erdo‘g‘on TRT teleradiokompaniyasiga Turkiyadagi prezidentlik va parlament saylovlari oldidan bergan intervyusida ma’lum qilgan.
Turkiya prezidentning so‘zlariga qaraganda, u va Putin o‘rtasida xuddi Rossiya va Turkiya o‘rtasidagi kabi ijobiy munosabatlar shakllangan. Bu ayniqsa Anqara Suriya shimolida “Zaytun novdasi” operatsiyasini boshlaganida, shuningdek, Suriyadagi vaziyatni barqarorlashtirishga bag‘ishlangan Ostona va Sochi muzokaralari davomida o‘z tasdig‘ini topgan.
24-iyun, yakshanba kuni Turkiyada muddatidan oldingi prezidentlik saylovlari bo‘lib o‘tadi.Prezidentlikka Rajab Toyyib Erdo‘g‘on (ayni paytda hukumat tepasida turgan Adolat va taraqqiyot partiyasi), Muharram Inje (Xalq respublikachilar partiyasi – bosh muxolifatchi partiya), Salohiddin Demirtosh (kurdlar manfaatini himoya qiluvchi Xalqlar demokratiyasi partiyasi), Meral Akshener (Yaxshi partiya), Temel Karamollao‘g‘li (“Saodat”partiyasi) va Dogu Perincheklar (“Vatan” partiyasi) o‘z nomzodini qo‘ygan. Prezidentlik bilan bir vaqtda parlament saylovlari ham bo‘lib o‘tadi.
Izoh (0)