Moliyaviy institutlarga kelajakda uyushtiriladigan kiberhujumlar oqibatidagi zarar yiliga 100 — 350 milliard dollarga yetishi mumkin. Bu banklar daromadiga jiddiy zarar keltirib, hatto moliyaviy barqarorlikka ham tahdid solishi mumkin. Bu haqda Xalqaro valyuta jamg‘armasi ogohlantirdi, deb yozmoqda “RIA Novosti”.
Jamg‘arma direktori Kristin Lagard tashkilot tomonidan o‘tkazilgan tadqiqotni taqdim etgan. Unda 50 ta mamlakatda amalga oshirilgan kiberhujumlar oqibatida yaqin vaqt ichida ko‘rilgan zararlar tahlil qilingan. Jamg‘arma rahbarining aniqlik kiritishicha, moliyaviy tizimga keng miqyosli muvaffaqiyatli hujumlar bo‘lmagani uchun har qanday prognoz qilish murakkab hisoblanadi.
Lagardning so‘zlariga ko‘ra, kiberhujumlar oqibatida o‘rtacha yillik potensial yo‘qotish banklarning global miqyosdagi daromadining to‘qqiz foiziga yaqin, ya’ni taxminan 100 milliard dollar bo‘lishi mumkin. Hujumlar chastotasi oldingiga qaraganda ikki marta yuqori bo‘lsa, zarar 2,5—3,5 marta ko‘p, ya’ni 270 — 350 milliard dollarga yetishi mumkin.
Jamg‘arma tomonidan modellashtirilgan holatlarning besh foizida banklar hujum oqibatida sof daromadining deyarli yarmini yo‘qotishi mumkinligi ma’lum bo‘lgan.
Izoh (0)