Jizzax viloyati Zafarobod tumanida yashovchi ayol 2018-yilning 28-may kuni soat 14:30 larda turmush o‘rtog‘iga ikki marotaba pichoq sanchib olgan. Bu haqda Jinoyat ishlari bo‘yicha Zafarobod tuman sudi matbuot xizmati xabar berdi.
Ma’lumotlarga ko‘ra, er-xotin o‘rtasida yuz bergan noxush hodisaga rashk qilish, xiyonat, ajrashish, spirtli ichimlik ichish va telefonda begona erkaklar bilan gaplashish masalalarida oqibatida kelib chiqqan janjal sabab bo‘lgan.
Ayol o‘z turmush o‘rtog‘ining o‘ng tomon ko‘krak qafasi 2—3-qovurg‘alari orasiga, shuningdek, chap kurak yuqori sohasi bo‘yin umurtqalar orasiga pichoq urib, kesib tan jarohati yetkazgan. Olingan tan jarohatlari sabab erkak shifoxonaga yotqizilgan.
Mazkur jinoyat ishi Zafarobod tuman sudi tomonidan 2018-yil 13-iyun kuni ko‘rib chiqilib, ayblanuvchining aybiga to‘liq iqrori va chin ko‘ngildan pushaymonligini, oilaviy ahvolini, qaramog‘ida ikki nafar farzandi borligini, ayol kishi ekanligini, muqaddam sudlanmaganligini, turmush o‘rtog‘ining unga nisbatan da’vosi yo‘qligini inobatga olib, unga O‘zbekiston Respublikasi Jinoyat kodeksi 104-moddasining 1-qismi bilan 3 (uch) yil muddatga ozodlikni cheklash jazosi tayinlangan.
Izoh (0)