Жиззах вилояти Зафаробод туманида яшовчи аёл 2018 йилнинг 28 май куни соат 14:30 ларда турмуш ўртоғига икки маротаба пичоқ санчиб олган. Бу ҳақда Жиноят ишлари бўйича Зафаробод туман суди матбуот хизмати хабар берди.
Маълумотларга кўра, эр-хотин ўртасида юз берган нохуш ҳодисага рашк қилиш, хиёнат, ажрашиш, спиртли ичимлик ичиш ва телефонда бегона эркаклар билан гаплашиш масалаларида оқибатида келиб чиққан жанжал сабаб бўлган.
Аёл ўз турмуш ўртоғининг ўнг томон кўкрак қафаси 2—3-қовурғалари орасига, шунингдек, чап курак юқори соҳаси бўйин умуртқалар орасига пичоқ уриб, кесиб тан жароҳати етказган. Олинган тан жароҳатлари сабаб эркак шифохонага ётқизилган.
Мазкур жиноят иши Зафаробод туман суди томонидан 2018 йил 13 июнь куни кўриб чиқилиб, айбланувчининг айбига тўлиқ иқрори ва чин кўнгилдан пушаймонлигини, оилавий аҳволини, қарамоғида икки нафар фарзанди борлигини, аёл киши эканлигини, муқаддам судланмаганлигини, турмуш ўртоғининг унга нисбатан даъвоси йўқлигини инобатга олиб, унга Ўзбекистон Республикаси Жиноят кодекси 104-моддасининг 1-қисми билан 3 (уч) йил муддатга озодликни чеклаш жазоси тайинланган.
Изоҳ (0)