Shayxontohur tuman prokurori joriy yilning birinchi choragida olib borgan ishlari yuzasidan xalq deputatlari tuman kengashida hisobot berdi. Bu haqda O‘zA ma’lum qildi.
Unda Shayxontohur tuman prokuroriga biriktirilgan 2-sektorda amalga oshirilgan ishlar, aniqlangan muammolar, ushbu muammolarni bartaraf etish bo‘yicha ko‘rsatilgan amaliy yordamlar muhokama etilib, ikkinchi chorakda amalga oshirilishi kerak bo‘lgan chora-tadbirlari belgilab olindi.
Jumladan, joriy yilning o‘tgan davrida ishchi guruh a’zolari 2200 ga yaqin xonadonda bo‘lib, 171 ta muammoli xonadonni aniqlandi. Ularning aksariyati obodonlashtirish, tibbiy yordam, ish bilan ta’minlash, moddiy yordam va XUJMShlar bilan bog‘liq bo‘lib, 100 ga yaqini joyida hal etildi.
Sektor hududidagi 1,2,3,4-sonli ko‘p qavatli uylar, 5,6,7,8 uylar oralig‘ida obodonlashtirish, ko‘kalamzorlashtirish ishlari olib borilgan. Aholi uchun 4 ta favvora, hovuz va bolalar maydonchalari qurilib, o‘rindiqlar qo‘yildi. Shuningdek, tuman prokuraturasining tashabbusi bilan sektordagi ijtimoiy himoyaga muhtoj oilalarga muntazam amaliy yordam berilmoqda.
Sektorda tadbirkorlik faoliyatini rivojlantirish, ularni qo‘llab-quvvatlash va huquqiy himoyasini ta’minlash choralari ham ko‘rilmoqda. Xususan, tuman prokuraturasi o‘tgan davrda 13 nafar tadbirkorga kredit mablag‘lari ajratilishi, 16 nafariga o‘z biznesini boshlashi uchun amaliy yordam berdi. Natijada tumanda 70 ta yangi ish o‘rni yaratildi.
Tuman prokurori hududda faoliyat ko‘rsatmayotgan tadbirkorlik subyektlarini qayta tiklash maqsadida haftaning payshanba kunlari faoliyati to‘xtatilgan tadbirkorlar bilan individual tarzda suhbatlashmoqda. Bu ham o‘zining ijobiy samarasini bermoqda. Joriy yilning to‘rt oyida 24 ta faoliyati to‘xtatilgan tadbirkorning qayta ish boshlab, 41 ta ish o‘rni yaratgani buning isbotidir.
Izoh (0)