Islom sitvilizatsiyasi markazi, Imom Buxoriy xalqaro ilmiy-tadqiqot markazi va O‘zbekiston xalqaro islom akademiyasi vakillaridan iborat delegatsiya Fransiya musulmonlari kengashida uchrashuv o‘tkazdi. Bu haqda O‘zA xabar berdi.
Fransiya musulmonlari kengashi mamlakatdagi eng yirik musulmonlar uyushmasi bo‘lib, uning tarkibiga turk, arab va afrika musulmonlari assotsiatsiyalari kiradi. Kengash huzurida islomning musaffoligini saqlash bo‘yicha maxsus bo‘lim faoliyat yuritadi.
– Samarqand, Buxoro, Xiva kabi tarixiy shaharlar butun musulmon dunyosining gavhari hisoblanadi, – deydi Fransiya islom kengashi a’zosi Abdulloh Zekriy. – Men ko‘plab shaharlarga sayohat qilganman, lekin Samarqanddek durdona shaharni ko‘rmaganman. Butun dunyo musulmonlari Samarqandga borishni, Imom Buxoriy maqbarasini ziyorat qilishni orzu qiladi.
– O‘zini musulmonman degan kishi borki, Imom Buxoriyni hurmat qiladi, – deydi Komor va G‘arbiy Afrika musulmonlari federatsiyasi bosh kotibi Assani Fassasi. Demakki, Buxoriy yurti bo‘lmish O‘zbekistonga yuksak e’tibor ko‘rsatadi. Imom Buxoriy, Imom Termiziy, Imom Zamaxshariy, Imom Dorimiy, Bahouddin Naqshband, Imom Nasafiy, Abu Lays Samarqandiy, Burhoniddin Marg‘inoniy kabi alloma darg‘alar Alloh taoloning cheksiz marhamatidir.
Izoh (0)