Qonunchilik palatasi deputatlari, Oliy Majlis Senati a’zolari hamda “Xalq so‘zi” gazetasi muxbirlari bilan birgalikda Toshkentning Mirobod tumanidagi mahallalar ahvolni o‘rgandi. Bu haqda “Xalq so‘zi” gazetasining saytida xabar berildi.
Ilk manzil – “Bayot” mahallasi markazdan eng chetda, Qo‘yliq bozori atrofida joylashgan. Bugun bu yerda 1300 dan ortiq aholi istiqomat qiladi. Ularning asosiy qismini ko‘zi ojizlar tashkil etadi. Shu sababli ushbu mahalla fuqarolari uchun Orion Med City ko‘z kasalliklari klinikasi mutaxassislarining chuqurlashtirilgan tibbiy ko‘rigi tashkillashtirildi. Oftalmolog, nevropatolog, ginekolog, terapevt, jarroh, UZD, EKG xonalari mahalla aholisi uchun intensiv rejimda ishladi, fito-bar tashkil qilindi.
Tumandagi 2-oilaviy poliklinika faoliyati o‘rganilib, muassasa xodimlari ishiga salbiy baho berildi. Tibbiy daftarchalarda ko‘riklar haqidagi qaydlarning eng so‘nggilari 2011—2015-yillarga aloqadorligi aniqlandi.
Keyingi manzil “Ko‘zmunchoq” 521-maktabgacha ta’lim muassasasi bo‘ldi. Muassasagacha bo‘lgan yo‘l chiqindilar bilan to‘lgan, ammo bu holat mahalla aholisi va mas’ullarining e’tiboridan chetda qolgan. Parlament a’zolari bu yerga uch kun oldin ham tashrif buyurib, binoning umumiy ahvoli va bolalarni ovqatlantirish bo‘yicha bir qator kamchiliklarni qayd qilishgan edi. “Shirintoy” guruhida ro‘yxatga kiritilmagan bolalarning borligi aniqlangan. Muassasaga keltiriladigan oziq-ovqat mahsulotlari alohida o‘rganildi. Prezident tomonidan o‘tgan yili dekabrda tashkillashtirilgan videoselektorda joriy yilning 10-yanvariga qadar maktabgacha ta’lim muassasalarida ovqat tayyorlash jarayonini nazorat qilish uchun videokuzatuv kameralari o‘rnatilishi shartligi aytilgan. Biroq “Ko‘zmunchoq”da bunday ish hali yo‘lga qo‘yilmagan.
Izoh (0)