Sputnik muxbiri shu kunlarda Moskvada gastrol safarida bo‘lgan o‘zbek xonandasi Shahlo Safarova bilan suhbatlashdi.
—Hayot va ijodingiz haqida aytib bering.
—Ko‘p farzandli oilada Qozog‘istonning Chimkent shahrida tug‘ilganman. Mening bobom ko‘p savob ishlarni qilgan. Ular 2 nafar qozonlik va ukrainalik qizlarni voyaga yetkazishgan. Bizning oilamiz xalqlar do‘stligi oilasiga o‘xshaydi. Chunki sobiq Sovet ittifoqi bizga ta’sir qilgan. Oilamizda otam ham rus farzand boqib katta qilgan. Uning ismini Aleksandr Pavlovichdan Irisqulov Doniyorga o‘zgartirganmiz. O‘zim uni ikki ukamdan kam ko‘rmayman. Ijodimni boshlaganimda pullarni ko‘proq shu ukamga sarflashga harakat qilganman.
—Hayotingizda kasb tanlashingizga ta’sir qilgan voqea yoki inson bo‘lganmi?
—Kasb tanlashimga onam sababchi bo‘lganlar. Chunki kichikligimda ularning qo‘shiqlarini eshitardim. Otam 4 yoshimda o‘tib ketgan. Amakim aytishlariga ko‘ra, otam ham juda chiroyli ovozga ega bo‘lgan. Birinchi ustozim kompozitor Alisher Ikromov bo‘lgan. Taniqli o‘zbek xonanda Yulduz Usmonova qo‘shiqlarida o‘sganman.
—Ijodingiz nimadan boshlangan?
—Ijodim konsert va to‘ylardan boshlangan. Ilk bor televideniyeda Alisher Ikromov boshchiligidagi orkestr bilan chiqa boshladi. Mendan birinchi intervyuni Shuhrat Qayumov olgan. O‘zbek xalq shoiri Xurshid Davron menga juda katta yordam bergan.
—Oilangiz haqida aytib bering? Nechta farzandlaringiz bor?
—Bir nafar o‘g‘lim bor. Eng katta baxtim va taxtim shu o‘g‘limdir.
—Qanday mukofotlaringiz bor?
— Vatan qo‘shiq tanlovida viloyat bo‘yicha “Vatan” qo‘shig‘i bilan birinchilikni olganman. Men hurmat qilgan inson Shavkat Mirziyoyev Samarqand viloyati hokimi bo‘lgan vaqtlarda o‘qituvchilar kuniga bag‘ishlangan xayriya konsertida estalik devor soatini sovg‘a qilgan.—Hayotda ushalmagan orzularingiz bormi?—Albatta ushalmagan orzularim bor. “Istiqlol” saroyida katta konsertlar berish niyatim bor. Avval 5—6 yil Toshkentdagi “Zarafshon” zalida konsert berganman. Ko‘proq xayriya — xotin-qizlar kunlari, qariyalar uylarida konsertlar qilganmiz. Kam ta’minlanganlarni xayriya qilib chaqirardik. Orzularim — xalqni dardini ko‘proq kuylash, qo‘shiqlarim ularga yetib borishni xohlardim.—Ayollarning kuchi nimada deb o‘ylaysiz?
—O‘ylaymanki, ayollarning kuchi — latofatda, go‘zallikda, iffatda.
—Hayotingizni qay darajada sevasiz?
—Bir narsadan mamnunmanki, xalqqa xizmat qilayotganim, yaxshilik qilayotganim. Qo‘shiqlarim bilan yaxshilikni qalblarga yetkaza olayotganim, shu bilan faxrlanman va bundan ilhomlanib, hursand bo‘lib yashayman. San’atim meni hayot g‘am tashvishlaridan chalg‘itadi.
—Eng baxtsiz ayol qanaqa ayol deb hisoblaysiz?
—Farzandi yo‘q ayol bo‘lsa kerak deb o‘ylayman. Chunki onalik katta baxt.
—Nega oxirgi vaqtlarda ijodingizda tanaffus? Yana ijodda faol bo‘lib, konsert berishni xohlaysizmi?
—Ha albatta, hayotda ancha ijodimda tanaffus bo‘ldi. Konsert, televideniyadan chiqmay qoldim, lekin baribir mayda kichik konsertlar tashkil qilib, har doim ijod bilan shug‘ullanib kelaman. Daromadim faqat shu qo‘shiqlarim orqali. Hozir men Moskvaga gastrollarga kelishdan oldin Prezident Shavkat Mirziyoyev qabulxonasiga telefon qildim. Shunda ko‘p narsalarni aytib o‘tdim, masalan, litsenziya qimmat, ko‘plar to‘lay olmaydi. “O‘zbeknavo” yordam berib, qo‘llab-quvvatlasa qo‘shiqlarim, katta konsertlar qilsam yordam berishsa, deb iltimos bilan chiqqandim. Bu murojaatim ijobiy hal bo‘ldi. “O‘zbeknavo”dan 3 ta xat keldi. “Moskvadan qaytganizda, qo‘shiqlaringiz va kliplaringizni olib kelishingizni so‘raymiz, televideniye va radiolarda namoyish qilish uchun”, — deb aytishdi. Men baribir butun umr o‘zbek xalqiga xizmat qilib kelganman. Rossiyadan ketsam albatta O‘zbekistonda televideniya va radio orqali qo‘shiqlarim xalqimiz eshitib qoladi.
—O‘zbek san’atkorlar ijodi haqida qanday fikrdasiz, o‘zbek xonandalarini qo‘shiqlarini tinglaysizmi? Kimning ijodi ko‘proq yoqadi, xonandalardan ko‘proq kimga xavas qilasiz?
—Har bir san’atkorning o‘z yo‘li bor. O‘zbek xonandalari, ustoz san’atkorlar — Yulduz Usmonovani qo‘shiqlarini eshitaman. Ko‘proq ilhom bag‘ishlaydigan kuylarni tinglayman.
—O‘zbek xonanda va aktirasalarining ibo-hayosi, kiyinib yurishiga haqida qanday fikrdasiz. Rasmlarni internetga qo‘yishiga qanday qaraysiz?
—O‘ylaymanki, hamma narsa chiroyli va me’yorida bo‘lishi kerak. Chunki san’atkor xalq ko‘radi, san’atkor qanchalik o‘zini odob bilan o‘zini tutsa, xalq shundan ibrat oladi. Madaniyat xodimi o‘zini ijobiy namuna sifatida o‘zini ko‘rsata bilashi kerak.
—San’atda yulduz bo‘lish uchun iste’dodni o‘zi yetarli deb o‘ylaysizmi? Jonli ijroda necha kun konsert berishga kuchingiz yetadi?
—Hozirgi paytda san’atkor yulduz bo‘lishi uchun iste’dodni o‘zi yetarli emas bo‘lib qoldi. Chunki hamma yoq shou-biznes bo‘lib ketgan, hamma narsa pulga taqaladi. Homiylarsiz juda qiyin. Jonli ijroda qo‘shiq aytishga keladigan bo‘lsak, niyatim borki, yulduzlarimiz qatorida ikki hafta konsert berish niyatlarim bor.
—Rossiyada ijodingiz haqida aytib bering, konsertlar haqida aytib bering? Kelgusida qanday rejalaringiz bor?
—Rossiyaga o‘tgan yil yoz mavsumida keldim. Bu yerda ham konsert berishni boshladim. Ko‘proq Sankt-Peterburgda ishlarim yurishib konsertlar berdik. Hozir Moskvada 2—3 ta joyda konsert berdim. Rejalarim xalqqa xizmat qilishdir. Yangi qo‘shiqlarimdan “Meni hafa qilma”, “Vatan”, “Yigit yig‘lamasin” qo‘shiqlarini tayyorlaganman. Ayrimlari yozilib bo‘ldi, nasib qilsa teleradio eshitirishlar orqali namoyish qilinadi. Yana bir orzuim chet elda ishlab, qora mehnat qilib O‘zbekistonni budjetini to‘ldirayotgan, begona yurtlarda azob-uqubatlar yuz tutib shunchalik mehnat qilib birini ikki qalayotgan vatandoshlarimiz uchun qo‘shiq yaratish niyatim bor. Bu borada she’rlar yozganman. Rus tilida ham “Ne obijay menya”, “Ya jizn otdam za tebya” qo‘shiqlarim bor. Qo‘shiqlarga xalq shoirlari she’rlaridan olaman. O‘zbekcha qo‘shiq mualliflari ko‘proq orkestrda aytgan qo‘shiqlarimni Alisher Ikromov, Zokirjon Otaboyev so‘zlariga yozilgan.
Izoh (0)