Sputnik мухбири шу кунларда Москвада гастрол сафарида бўлган ўзбек хонандаси Шаҳло Сафарова билан суҳбатлашди.
—Ҳаёт ва ижодингиз ҳақида айтиб беринг.
—Кўп фарзандли оилада Қозоғистоннинг Чимкент шаҳрида туғилганман. Менинг бобом кўп савоб ишларни қилган. Улар 2 нафар қозонлик ва украиналик қизларни вояга етказишган. Бизнинг оиламиз халқлар дўстлиги оиласига ўхшайди. Чунки собиқ Совет иттифоқи бизга таъсир қилган. Оиламизда отам ҳам рус фарзанд боқиб катта қилган. Унинг исмини Александр Павловичдан Ирисқулов Дониёрга ўзгартирганмиз. Ўзим уни икки укамдан кам кўрмайман. Ижодимни бошлаганимда пулларни кўпроқ шу укамга сарфлашга ҳаракат қилганман.
—Ҳаётингизда касб танлашингизга таъсир қилган воқеа ёки инсон бўлганми?
—Касб танлашимга онам сабабчи бўлганлар. Чунки кичиклигимда уларнинг қўшиқларини эшитардим. Отам 4 ёшимда ўтиб кетган. Амаким айтишларига кўра, отам ҳам жуда чиройли овозга эга бўлган. Биринчи устозим композитор Алишер Икромов бўлган. Таниқли ўзбек хонанда Юлдуз Усмонова қўшиқларида ўсганман.
—Ижодингиз нимадан бошланган?
—Ижодим концерт ва тўйлардан бошланган. Илк бор телевидениеда Алишер Икромов бошчилигидаги оркестр билан чиқа бошлади. Мендан биринчи интервьюни Шуҳрат Қаюмов олган. Ўзбек халқ шоири Хуршид Даврон менга жуда катта ёрдам берган.
—Оилангиз ҳақида айтиб беринг? Нечта фарзандларингиз бор?
—Бир нафар ўғлим бор. Энг катта бахтим ва тахтим шу ўғлимдир.
—Қандай мукофотларингиз бор?
— Ватан қўшиқ танловида вилоят бўйича «Ватан» қўшиғи билан биринчиликни олганман. Мен ҳурмат қилган инсон Шавкат Мирзиёев Самарқанд вилояти ҳокими бўлган вақтларда ўқитувчилар кунига бағишланган хайрия концертида эсталик девор соатини совға қилган.—Ҳаётда ушалмаган орзуларингиз борми?—Албатта ушалмаган орзуларим бор. «Истиқлол» саройида катта концертлар бериш ниятим бор. Аввал 5—6 йил Тошкентдаги «Зарафшон» залида концерт берганман. Кўпроқ хайрия — хотин-қизлар кунлари, қариялар уйларида концертлар қилганмиз. Кам таъминланганларни хайрия қилиб чақирардик. Орзуларим — халқни дардини кўпроқ куйлаш, қўшиқларим уларга етиб боришни хоҳлардим.—Аёлларнинг кучи нимада деб ўйлайсиз?
—Ўйлайманки, аёлларнинг кучи — латофатда, гўзалликда, иффатда.
—Ҳаётингизни қай даражада севасиз?
—Бир нарсадан мамнунманки, халққа хизмат қилаётганим, яхшилик қилаётганим. Қўшиқларим билан яхшиликни қалбларга етказа олаётганим, шу билан фахрланман ва бундан илҳомланиб, ҳурсанд бўлиб яшайман. Санъатим мени ҳаёт ғам ташвишларидан чалғитади.
—Энг бахтсиз аёл қанақа аёл деб ҳисоблайсиз?
—Фарзанди йўқ аёл бўлса керак деб ўйлайман. Чунки оналик катта бахт.
—Нега охирги вақтларда ижодингизда танаффус? Яна ижодда фаол бўлиб, концерт беришни хоҳлайсизми?
—Ҳа албатта, ҳаётда анча ижодимда танаффус бўлди. Концерт, телевидениядан чиқмай қолдим, лекин барибир майда кичик концертлар ташкил қилиб, ҳар доим ижод билан шуғулланиб келаман. Даромадим фақат шу қўшиқларим орқали. Ҳозир мен Москвага гастролларга келишдан олдин Президент Шавкат Мирзиёев қабулхонасига телефон қилдим. Шунда кўп нарсаларни айтиб ўтдим, масалан, лицензия қиммат, кўплар тўлай олмайди. «Ўзбекнаво» ёрдам бериб, қўллаб-қувватласа қўшиқларим, катта концертлар қилсам ёрдам беришса, деб илтимос билан чиққандим. Бу мурожаатим ижобий ҳал бўлди. «Ўзбекнаво»дан 3 та хат келди. «Москвадан қайтганизда, қўшиқларингиз ва клипларингизни олиб келишингизни сўраймиз, телевидение ва радиоларда намойиш қилиш учун», — деб айтишди. Мен барибир бутун умр ўзбек халқига хизмат қилиб келганман. Россиядан кетсам албатта Ўзбекистонда телевидения ва радио орқали қўшиқларим халқимиз эшитиб қолади.
—Ўзбек санъаткорлар ижоди ҳақида қандай фикрдасиз, ўзбек хонандаларини қўшиқларини тинглайсизми? Кимнинг ижоди кўпроқ ёқади, хонандалардан кўпроқ кимга хавас қиласиз?
—Ҳар бир санъаткорнинг ўз йўли бор. Ўзбек хонандалари, устоз санъаткорлар — Юлдуз Усмоновани қўшиқларини эшитаман. Кўпроқ илҳом бағишлайдиган куйларни тинглайман.
—Ўзбек хонанда ва актирасаларининг ибо-ҳаёси, кийиниб юришига ҳақида қандай фикрдасиз. Расмларни интернетга қўйишига қандай қарайсиз?
—Ўйлайманки, ҳамма нарса чиройли ва меъёрида бўлиши керак. Чунки санъаткор халқ кўради, санъаткор қанчалик ўзини одоб билан ўзини туца, халқ шундан ибрат олади. Маданият ходими ўзини ижобий намуна сифатида ўзини кўрсата билаши керак.
—Санъатда юлдуз бўлиш учун истеъдодни ўзи етарли деб ўйлайсизми? Жонли ижрода неча кун концерт беришга кучингиз етади?
—Ҳозирги пайтда санъаткор юлдуз бўлиши учун истеъдодни ўзи етарли эмас бўлиб қолди. Чунки ҳамма ёқ шоу-бизнес бўлиб кетган, ҳамма нарса пулга тақалади. Ҳомийларсиз жуда қийин. Жонли ижрода қўшиқ айтишга келадиган бўлсак, ниятим борки, юлдузларимиз қаторида икки ҳафта концерт бериш ниятларим бор.
—Россияда ижодингиз ҳақида айтиб беринг, концертлар ҳақида айтиб беринг? Келгусида қандай режаларингиз бор?
—Россияга ўтган йил ёз мавсумида келдим. Бу ерда ҳам концерт беришни бошладим. Кўпроқ Санкт-Петербургда ишларим юришиб концертлар бердик. Ҳозир Москвада 2—3 та жойда концерт бердим. Режаларим халққа хизмат қилишдир. Янги қўшиқларимдан «Мени ҳафа қилма», «Ватан», «Йигит йиғламасин» қўшиқларини тайёрлаганман. Айримлари ёзилиб бўлди, насиб қилса телерадио эшитиришлар орқали намойиш қилинади. Яна бир орзуим чет элда ишлаб, қора меҳнат қилиб Ўзбекистонни бюджетини тўлдираётган, бегона юртларда азоб-уқубатлар юз тутиб шунчалик меҳнат қилиб бирини икки қалаётган ватандошларимиз учун қўшиқ яратиш ниятим бор. Бу борада шеърлар ёзганман. Рус тилида ҳам «Не обижай меня», «Я жизн отдам за тебя» қўшиқларим бор. Қўшиқларга халқ шоирлари шеърларидан оламан. Ўзбекча қўшиқ муаллифлари кўпроқ оркестрда айтган қўшиқларимни Алишер Икромов, Зокиржон Отабоев сўзларига ёзилган.
Изоҳ (0)