Yomg‘irdan keyin Qarshi ko‘chalari suv ostida qoldi (foto)

Kuni kecha yog‘gan yomg‘irdan so‘ng Qarshi shahar ko‘chalarida hosil bo‘lgan sun’iy “dengiz”lar maktab o‘quvchilari, avtomobil haydovchilari, umuman, barchaning dilini xufton qildi, deb yozadi O‘zA.

Qayd etilishicha, kuchli yomg‘irdan so‘ng suv yo‘l topolmay katta yo‘l chetlarida o‘rnatilgan beton ariqlardan toshib, unda-bunda to‘planib qoldi.

Aslida, bunday noxush vaziyatlar yuzaga kelishiga shaharsozlik qurilishida kanalizatsiya tarmoqlari yaxshi yo‘lga qo‘yilmagani sabab bo‘lmoqda. Bu muammoga piyodalar yo‘laklari yonida tashkil qilingan obodonlashtirish maydonchalaridagi gul yoki manzarali daraxt ko‘chatlarini oqar suv bilan sug‘orish davomida ham duch kelinmoqda, deyiladi xabarda.

“Shaharda katta-katta muhtasham imoratlar loyihasini tuzayotgan mutasaddilar, nahotki, sizot suvlari oqib ketish yo‘nalishlarini hisobga olmagan bo‘lsa? Yaxshiyamki, viloyat yomg‘iru jala uzoq vaqt tinimsiz yog‘adigan hudud emas. Yo‘qsa, shahar aholisi allaqachon ko‘chalar bo‘ylab qayiqlarda yurishiga to‘g‘ri kelarmidi?” — deyiladi xabarda.