Rossiyalik milliarder Alisher Usmonov superzamonaviy turistik majmua — “Ko‘hna va boqiy Buxoro” loyihasida beg‘araz homiylik sharti bilan ishtirok etmoqda. Bu haqda Sputnik muxbiriga O‘zbekiston Turizmni rivojlantirish davlat qo‘mitasi rahbari Aziz Abduhakimov ma’lum qilgan, deb yozadi “Pravda Vostoka”.
A.Abduhakimovning aytishicha, Alisher Usmonovning ishtiroki turistik zonani keyinchalik homiy boshqaruviga topshirishni nazarda tutmaydi.
Obyekt to‘liq O‘zbekiston tomoni ixtiyorida bo‘ladi.
“U (Alisher Usmonov) ushbu loyihaning homiysi sifatida, deylik metsenat tarzida ishtirok etmoqda. Katta loyihani amalga oshirish rejalashtirilgan, budjet ham aniq, ammo aniq raqamlar loyihalashtirish ishlari natijalariga ko‘ra ma’lum bo‘ladi”, — deb qayd etdi A.Abduhakimov.
Yangi turistik zona G‘ijduvon ko‘chasi va “Ko‘hna va boqiy Buxoro” madaniy majmuasi oralig‘ida joylashgan 10 gektar joyda barpo etiladi. Zona maydonida pastqavatli zamonaviy mehmonxonalar, madaniy-sog‘lomlashtirish va savdo-ko‘ngilochar markazlarini barpo etish rejalashtirilgan. Ularda chet ellik sayyohlarga kun-u tun xizmat ko‘rsatish va maroqli hordiq chiqarish ta’minlanadi.
Turistik zonada turli shoular, tarixiy voqealarni aks ettirgan teatrlashtirilgan konsert tomoshalari namoyish etiladi va folklor ansambllari bilan birga zamonaviy estrada xonandalarining chiqishlari, liboslar namoyishi va boshqa tomoshabop tadbirlar tashkil etiladi.
Buxoroning qadimiy qismi to‘liq bepul Wi-Fi bilan qoplanadi.
Izoh (0)