“Mehr va Oqibat” hayvonlarni himoya qilish jamiyatiga 2014-yil oxiridan buyon Jizzaxning Paxtakor shahri aholisi ko‘p bora murojaat qilib, shaharda egali va egasiz jonivorlarning shafqatsizlik bilan yo‘q qilinayotgani haqida shikoyat qilgan. Endi ushbu shaharning olti nafar fuqarosi videomurojaat orqali shahar ko‘chalarida hayvonlarni qirishni bas qilishda yordam berishni so‘rab jamoatchilik va davlat organlariga yuzlandi, deb yozadi “Gazeta.uz”.
Fuqarolar so‘zlariga ko‘ra, tuman obodonlashtirish boshqarmasi xodimlari kechalariyam, kunduzlariyam odamlarning ko‘z o‘ngida hayvonlarni belkurak dastasi bilan kaltaklab, so‘ng ularni qoplarga solib, olib ketgan. Fuqarolarning jonivorlarga shafqatsiz munosabatni bas qilish iltimoslariga javoban, istagan joylariga murojaat qilishlarini aytishgan.
Ammo fuqarolar arizalar yuborgan davlat organlari va mahalliy organlar ham vaziyatga jiddiy yondashmagan. Masalan, Ichki ishlar vazirligi “ushbu faktlar o‘z tasdig‘ini topmagani sababli, tekshiruvni to‘xtatgan”.
“Odamlar yordam so‘rayapti, jonivorlarga nisbatan shafqatsizlikni to‘xtatishni so‘rayapti, biz buni bolalar ko‘rayotganidan xavotirdamiz. Ustiga-ustak, pasporti bo‘lgan jonivorlarni ham olib ketish — noqonuniy”, — dedi “Mehr va Oqibat” jamiyati direktori Komila Shoalimova. Jamiyat davlat organlariga yuzlanib, uysiz hayvonlar muammosini insoniy yo‘l bilan hal qilishda davlatga yordam berishga tayyorligini bildirdi.
Izoh (0)