Davlat rahbarining 2017-yil 11-avgustdagi “Ichki ishlar organlarining ozodlikdan mahrum qilish bilan bog‘liq bo‘lgan jazolarni ijro etish sohasidagi faoliyatini tubdan takomillashtirish chora-tadbirlari to‘g‘risida”gi qarorida jazoni ijro etish muassasalalarida mahkumlarga, ular bilan ko‘rishish uchun kelgan yaqinlariga uchrashish uchun zarur shart-sharoit yaratishga e’tibor qaratilgan, deb yozadi UZ24.
Ushbu qaror ijrosini ta’minlash maqsadida jazoni ijro etish muassasalarida uzoq muddatli uchrashuvlarga xonalar taqdim etganlik uchun yangi tariflar Moliya va Ichki ishlar vazirliklari tomonidan 2017-yil 29-dekabrda tasdiqlandi. Mazkur qaror 2018-yil 17-yanvarda Adliya vazirligida ro‘yxatdan o‘tkazildi.
Hujjatga ko‘ra, 2 kishilik xonaga sutkalik to‘lov eng kam ish haqining 5 foizi, ya’ni 8612 so‘m, 3 kishilik xonaga sutkalik to‘lov eng kam ish haqining 10 foizi miqdorida, ya’ni 17 224 so‘m, 4 kishilik xonaga sutkalik to‘lov eng kam ish haqining 15 foizi miqdorida, ya’ni 25 836 so‘m etib belgilandi (ilgari 2 kishilik xonaga sutkalik to‘lov — 15 895 so‘m, 3 kishilik xonaga — 30 100 so‘m, 4 kishilik xonaga — 45 166 so‘mni tashkil etgan).
Bu mablag‘lar xonalarni saqlash uchun sarflanadigan xarajatlar, ularni joriy va kapital ta’mirlash, xo‘jalik inventarlarini sotib olish uchun sarflanadi.
IIV Jamoatchilik va ommaviy axborot vositalari bilan aloqalar boshqarmasi boshlig‘i – Ichki ishlar vazirining Matbuot kotibi general-mayor Qutbiddin Burxonovning ma’lum qilishicha, tarif asosida to‘lovlar mahkumlardan, 16 yoshgacha bo‘lgan bolalardan (agar bolalar katta yoshli kishilar bilan kelmagan bo‘lsa), 1-guruh nogironligi bo‘lgan shaxslardan, kam ta’minlangan oilalardan bo‘lgan shaxslardan (fuqarolarning o‘zini o‘zi boshqarish organi ma’lumotnomasi asosida) undirilmaydi.
Ayni paytda mahkumlarga masofali video-uchrashuv tashkil etish imkoniyatini nazarda tutgan holda himoyalangan aloqa kanali bo‘yicha videokonferensiya tizimini bosqichma-bosqich joriy etish yuzasidan ish olib borilmoqda.
Shuningdek, O‘zbekistonda hibsga olingan va jinoiy javobgarlikka tortilgan shaxslarga nisbatan qiynoqqa solish, ruhiy hamda jismoniy bosim o‘tkazish, jazoni ijro etish muassasalarida boshqa g‘ayriinsoniy zo‘ravonlikka mutlaqo yo‘l qo‘yilmaslik borasidagi faoliyatni tubdan takomillashtirish bo‘yicha 2018—2022-yillarga mo‘ljallangan chora-tadbirlar dasturi loyihasi ishlab chiqilmoqda.
Izoh (0)