Samarqand shahri hokimi Furqat Rahimov Ispaniyaga safari chog‘ida sayyohlik sohasini hamda iqtisodiyotning boshqa tarmoqlarini rivojlantirish yuzasidan Valensiya orttirgan tajribani o‘rganish maqsadida mazkur provinsiyada bo‘ldi. Bu haqda “Jahon” axborot agentligi xabar bermoqda.
Mintaqaga safar doirasida Valensiya avtonom hamjamiyati hukumatining raisi Xayme Puij, uning sayyohlik bo‘yicha o‘rinbosari Fransisk Kolomer, Ispaniya Kongressi deputati, YuNESKOning “Ipak yo‘li” dasturi muvofiqlashtiruvchisi Xose-Maria Chikiyo, ushbu mintaqaning Sayyohlik agentliklari federatsiyasi prezidenti Salvador Amoros hamda sayyohlik firmalari, sharob ishlab chiqarish, gastronomiya biznesi va to‘qimachilikka ixtisoslashgan kompaniyalarning vakillari bilan uchrashuv hamda muzokaralar o‘tkazildi.
Muzokaralar yakunlari o‘laroq, 2018-yilning birinchi yarmida Valensiya va Samarqand o‘rtasida birodarlashgan shaharlar aloqalarini o‘rnatish bo‘yicha Protokol imzolash yuzasidan dastlabki kelishuvga erishilgani barobarida “Valensiyada Samarqand kunlari” deb nomlangan yirik madaniy-sayyohlik tadbirini o‘tkazishga ham kelishib olindi.
Valensiya muxtor provinsiyasi Ispaniyaning eng ko‘hna mintaqalaridan biri hisoblanadi. Sayyohlik jabhasi Valensiya iqtisodiyotida eng muhim o‘rinni egallaydi. Bu soha mintaqa iqtisodiyoti tizimining salkam 15 foizini tashkil qiladi. Muxtor provinsiyaning 15 foizdan ziyod mehnatga layoqatli aholisi ushbu jabhada faoliyat ko‘rsatadi. Keyingi yillar davomida sayyohlik mazkur mintaqa iqtisodiy rivojlanishining harakatlantiruvchi kuchiga aylandi.
Izoh (0)