Amerikalik aktyor va prodyuser Vin Dizel “Forsaj” franshizasining 11-qismida marhum aktyor Pol Uoker yana paydo bo‘lishini rasman tasdiqladi. Bu haqda u Los Anjelesdagi kinofestivalda ma’lum qildi.
Pol Uoker 2013-yil noyabrda, 40 yoshida avtohalokatda halok bo‘lgan edi. “Forsaj” jamoasi uning xotirasini saqlab qolish maqsadida aktyorning obrazini vizual effektlar va arxiv kadrlari yordamida jonlantirishni rejalashtirmoqda. Shu bilan birga, Uokerning akalari Kaleb va Kodi Uokerlar filmni suratga olish jarayonida ko‘mak berishi kutilmoqda.
Vin Dizel jurnalistlar bilan suhbatda shunday dedi:
“Biz Polning xotirasini hurmat qilamiz. Yangi film tomoshabinlarga ilk qismlardagi muhitni — tungi Los Anjeles, ko‘cha poygalari va avtomobillar tyuningi muhitini qayta his qilish imkonini beradi”.
“Forsaj”ning 11-qismi 2027-yil aprelda katta ekranlarga chiqadi va bu franshizaning yakuniy bo‘limi bo‘ladi. Biroq rejissyor Lui Leterrye avvalroq film premyerasi 2026-yilga rejalashtirilganini bildirgan edi. Mazkur tafovut loyihaning kechikishi mumkinligidan dalolat beradi.
Pol Uoker va Vin Dizel “Forsaj”dagi Dominik Toretto va Brayan O’Konnor rollari orqali kino olamida mashhur bo‘lish bilan birga, hayotda ham yaqin do‘stlar edi. Dizel Uokerning o‘limidan so‘ng uni “o‘z qalbining bir bo‘lagi” deb atagan va uni tez-tez xotirlab kelmoqda. Aktyor hattoki Pol Uokerning qizi Midou Uokerning to‘yida ham ishtirok etgan.
“Forsaj” ilk bor 2001-yilda namoyish etilgan bo‘lib,10 ta qismli filmlari va bir nechta spin-offlari chiqqan. 2023-yilda namoyish etilgan “Forsaj 10” dunyo bo‘ylab 522 million dollar daromad keltirgan. Film byudjeti esa taxminan 340 million dollar bo‘lgan.
Izoh (0)